AMEA-nın Naxçıvan Bölməsində “Naxçıvan Azərbaycan Xalq Cümhuriyyəti dövründə: tarixilik və ərazi bütövlüyünün qorunması” mövzusunda elmi konfrans keçirilib.

www.science.gov.az saytı yazır ki, tədbiri bölmənin sədri, akademik İsmayıl Hacıyev açaraq AXC-nin dövlətçilik tariximizdəki yeri və rolundan  danışıb. Bildirib ki, cəmi 23 ay yaşayan AXC dövründə Azərbaycan dili dövlət dili elan olunub, Milli Ordu yaradılıb, tələbələr xarici ölkələrin ali məktəblərinə oxumağa göndərilib. Akademik müstəqil Azərbaycanın AXC-nin hüquqi varisi olduğunu bildirib, onun yubileyləri ilə bağlı ümummilli lider Heydər Əliyevin və ölkə Prezidenti İlham Əliyevin imzaladığı fərman və sərəncamların əhəmiyyətindən danışıb.

Sonra Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri Rəhman Məmmədov, bölmənin Tarix, Etnoqrafiya və Arxeologiya İnstitutunun direktоru, AMEA-nın müxbir üzvü Fəxrəddin Səfərli, AMEA-nın müxbir üzvü Vəli Baxşəliyev , tarix üzrə fəlsəfə doktoru, dosent Emin Şıxəliyev və tarix üzrə fəlsəfə doktoru Musa Quliyev  çıxış ediblər.

                                                                                    Əlipənah BAYRAMOV,
“Xalq qəzeti”