Belarus teleməkanında ən baxımlı verilişlərdən olan “Kulinariya diplomatiyası” növbəti buraxılışını Azərbaycan mətbəxinə həsr edib. Bu barədə Diasporla İş üzrə Dövlət Komitəsindən məlumat verilib.

 Verilişdə Belarus Azərbaycan İcmaları Konqresi İdarə Heyətinin üzvü Gülnarə İmanova və təşkilatın fəal üzvlərindən biri Olesya Kosokin zəngin Azərbaycan mətbəxindən söhbət açıblar. Onlar Azərbaycan kulinariyasının tarixi və özünəməxsusluğuna görə digər qonşu xalqların mətbəxindən xeyli fərqləndiyini Belarus tamaşaçılarının diqqətinə çatdırıblar. Bildiriblər ki, milli xörəklərimiz dadına və hazırlanma texnologiyasına, həmçinin ədviyyatdan geniş istifadə olunmasına görə daha çox Şərq mətbəxinə yaxındır. Verilişdə qeyd olunub ki, 2000-ə yaxın xörək növü olan Azərbaycan milli mətbəxi dünyanın ən qədim, zəngin və dadlı mətbəxlərindən biridir.

Ülviyyə VAHİDQIZI,
“Xalq qəzeti”