Reymsdə Azərbaycan şairi Məhsəti Gəncəvinin 900 illiyinə həsr olunan sərgi təşkil edilmişdir

 

 

Azərbaycanın zəngin mədəniyyətini  fransızlara yaxından tanıtmaq məqsədi ilə müxtəlif tədbirlər hazırlayıb həyata keçirən Heydər Əliyev Fondunun təşkilatçılığı və ölkəmizin Fransadakı səfirliyinin dəstəyi ilə noyabrın 28-də Fransanın tarixində mühüm rol oynayan və ən qədim şəhərlərindən olan Reymsin möhtəşəm To sarayında rübailəri ilə Azərbaycan ədəbiyyatını zənginləşdirən Məhsəti Gəncəvinin 900 illiyinə  həsr olunan sərgi təşkil edilmişdir.

Sərgini açan sarayın inzibatçısı Benua-Anri Papuno bu cür tədbirlərin müxtəlif mədəniyyətlərə malik xalqların biri-birlərini yaxından tanıması, ölkə barəsində məlumatlar əldə edilməsində müstəsna rol oynadığını, sərgidə nümayiş etdirilən eksponatların Azərbaycanın qədim və zəngin mədəniyyətindən xəbər verdiyini vurğulamışdır.

Qonaqları salamlayan şəhər merinin müavini Jak Kuen çıxışında Azərbaycanın ilk dəfə Reymsdə təşkil olunan beynəlxalq yarmarkada iştirak etməsindən məmnunluq hissi duyduğunu, Məhsəti Gəncəvi ilə bağlı şəhərdə keçirilən silsilə tədbirlərin davamı kimi Azərbaycan incəsənət ustalarının Reyms Konservatoriyasında çıxış edəcəyini bildirmişdir.

Ölkəmizin mədəni dəyərlərlə zəngin olduğunu diqqətə çatdıran Jan Kuen sərgidə nümayiş olunan eksponatların Azərbaycanın qədim bir ölkə kimi şəhər əhalisində ətraflı təsəvvür yaradacağına əminliyini vurğulamışdır. 

Şampan-Ardenn Regional Şurasının sədri Jan-Pol Başi Fransa nümayəndə heyətinin tərkibində Bakıda keçirilən Üçüncü Beynəlxalq Humanitar Forumla əlaqədar ölkəmizə səfər etdiyini xatırlatmış, Azərbaycanın dünyanın iki qitəsinin və müxtəlif ölkələrin yol ayrıcında, qədim sivilizasiyaların qovuşuğunda yerləşdiyini, özünəməxsus adət və ənənələri olduğunu bildirmişdir.

Azərbaycanın yeraltı sərvətlərlə, xüsusilə neft və qazla zənginliyini diqqətə çatdıran regional sədr Bakı və Gəncənin ölkəmizin əsas böyük  şəhərləri olduğunu, son zamanlar hər iki şəhərin müasir görkəm aldıqlarını vurğulamış, Reyms Universitetinin Gəncə Dövlət Universiteti ilə əlaqələr qurmaqda maraqlı olduğunu bəyan etmişdir.

Gəncədə keçirilən beynəlxalq şərab festivalında iştirakını xatırladan Jan-Pol Başi Şampan regionunun öz şərabları ilə dünyada tanındığını vurğulamış və bu sahədə Gəncə şəhəri ilə birgə fəaliyyətə önəm verdiyini, Azərbaycanda turizm imkanlarının genişləndiyini və bu istiqamətdə əməkdaşlığın yaradılmasının vacibliyini  qeyd etmişdir.

O, Gəncədə yaşayıb yaratmış Məhsəti Gəncəvinin yalnız Vətəninin gözəlliyini tərənnüm edən rübailər müəllifi kimi deyil, eyni zamanda, lirik məhəbbət mahnılarının ifaçısı kimi də məşhur olduğunu bildirmişdir. 

Ölkəmizin Fransadakı səfirliyinin müşaviri Nigar Hüseynova  Xll əsrin şairəsi, yazıçısı, rəssamı və kalliqrafiya ustası kimi tanınan   Məhsəti Gəncəvinin Şərq intibahının mədəniyyət mərkəzlərindən biri olan Azərbaycanın ikinci böyük şəhəri Gəncədə yaşayıb yaratdığını, bu şəhərdə öz əsərləri ilə bəşər ədəbiyyatını zənginləşdirən daha bir söz ustası Nizami Gəncəvinin də dünyaya göz açdığını diqqətə çatdırmışdır.

Məhsəti Gəncəvi yaradıcılığında bərabərlik, qardaşlıq və azadlıq kimi bəşəri ideyaların tərənnüm edildiyini xüsusi vurğulayan müşavir  şairənin ictimai həyatda da fəal rol oynadığını, gənc qızları öz ətrafına toplayıb ədəbi dərnək təşkil etdiyini, şairənin yaşadığı dövrdən 9 əsr keçməsinə baxmayaraq onun əsərlərinin bu gün də müasirliyini itirmədiyini bildirmişdir.

N.Hüseynova xalqına yüksək bəşəri ideyalar təlqin edən Məhsəti Gəncəvinin adına məktəblər və küçələr olduğunu, 1980-ci ildə doğma şəhəri Gəncədə ona abidə ucaldıldığını, Prezident İlham Əliyevin şairənin 900 illiyi ilə əlaqədar sərəncam imzaladığını, Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə Məhsəti Gəncəvinin əsərlərinin müxtəlif dillərə tərcümə olunaraq nəfis şəkildə çap edildiyini, şairənin xatirəsinin UNESCO kimi nüfuzlu təşkilatda və səfirlikdə qeyd olunduğunu bildirmişdir.

Gəncə Şəhər İcra Hakimiyyətinin başçısı Elmar Vəliyev Gəncənin Azərbaycanın ikinci şəhəri olmaqla yanaşı, həm də qədim mədəniyyət  və incəsənət mərkəzi olduğunu xatırlatmış, dünya ədəbiyyatına Nizami Gəncəvi və Məhsəti Gəncəvi kimi dühalar bəxş etdiyini vurğulamışdır.

O, Prezident İlham Əliyevin sərəncamlarına əsasən Nizami Gəncəvinin 870 və Məhsəti Gəncəvinin 900  illiyinin Azərbaycanda və onun hüdudlarından kənarda qeyd olunmasından böyük qürur hissi duyduğunu, Gəncədə Məhsəti Gəncəvi ilə bağlı silsilə tədbirlərlə yanaşı, ikinci beynəlxalq şərab festivalının keçirildiyini, festivalda Fransadan böyük nümayəndə heyətinin iştirak etdiyini, Gəncənin 2016-cı ildə “Avropa gənclərinin paytaxtı” elan olunduğunu bildirmişdir.

Prezident İlham Əliyevin apardığı uğurlu daxili və xarici siyasət sayəsində Azərbaycan iqtisadiyyatının sürətlə inkişaf etdiyini, beynəlxalq aləmdə imicinin möhkəmləndiyini vurğulayan icra başçısı Azərbaycanın birinci xanımı Mehriban Əliyevanın rəhbərlik etdiyi Heydər Əliyev Fondunun ölkəmizin mədəni dəyərlərini Fransada tanıtmaq istiqamətində böyük və yaddaqalan layihələr həyata keçirdiyini, ötən il Mehriban xanım Əliyevanın iştirakı ilə Reymsdə Azərbaycanla bağlı möhtəşəm tədbirin keçirildiyini diqqətə çatdırmış, ölkələrimiz arasında əməkdaşlığın inkişafının vacibliyini vurğulamışdır. 

Reyms Universitetinin vitse-prezidenti, professor Nureddin Manamanni çıxışında Gəncə Dövlət Universiteti ilə əlaqələrin qurulmasında, ikitərəfli əməkdaşlıqda və tələbə mübadiləsində maraqlı olduqlarını bildirmişdir.

Sərgidə nümayiş etdirilən Məhsəti Gəncəvi dövrünə məxsus qadın geyimləri, xalçalar, pul vahidləri, misgərlik və dulusçuluq sənət nümunələri, çini qablar və digər eksponatlar şəhər sakinlərinin və digər qonaqların böyük marağına səbəb olmuşdur.

 

Əsgər ƏLİYEV

AzərTAc-ın

xüsusi müxbiri

Reyms

 


© İstifadə edilərkən "Xalq qəzeti"nə istinad olunmalıdır.



  • I Avropa Oyunlarının təəssüratları uzun müddət xatirələrdə yaşayacaq

    I Avropa Oyunlarının təəssüratları uzun müddət xatirələrdə yaşayacaq

  • Hər gün bir tarix, hər gün bir zəfər

    Hər gün bir tarix, hər gün bir zəfər

  • Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

    Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

  • “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

    “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

  • Siyəzən birinci Avropa Oyunlarının məşəl estafetini qəbul etdi

    Siyəzən birinci Avropa Oyunlarının məşəl estafetini qəbul etdi

Çox oxunanlar



Təqvim

Hava haqqında