Sloveniyanın paytaxtı Lyublyanada finişə yaxınlaşmaqda olan futzal üzrə Avropa çempionatında yarımfinala ilk iki vəsiqəni Qazaxıstan və Rusiya komandaları qazanmışlar.

Qazaxıstan təmsilçiləri dörddəbir finalda Serbiya yığmasını məğlubiyyətə uğratmışlar–3:1, rusiyalılar isə yarış sahibləri Sloveniya komandasına iki cavabsız qolla qalib gəlmişlər–2:0.

Dörddəbir finalın daha iki oyunu dünən axşam keçirilmiş və Bakı vaxtı ilə gecəyarısı başa çatmışdır. İlkin mərhələdə Fransa komandasına qalib gəlib (5:3), ispaniyalı rəqiblərinə kiçik fərqlə (0:1) məğlub olan Azərbaycan futzalçıları Portuqaliya yığması ilə görüşmüşlər. Digər matçda İspaniya və Ukrayna komandaları qarşılaşmışlar.

Çempionatda yarımfinal oyunları fevralın 8-də keçiriləcək. Medalların sahibləri isə fevralın 10-da məlum olacaq.

Oqtay BAYRAMOV,
“Xalq qəzeti”