Fəlsəfə doktoru proqramı üzrə doktoranturaya (dissertanturaya) ali təhsil pilləsinin magistratura səviyyəsini bitirən (yaxud təhsili ona bərabər tutulan) və elmlər doktoru proqramı üzrə dissertanturaya (uyğun ixtisas üzrə elmlər namizədləri və fəlsəfə doktorları elmi dərəcəsi olan) Azərbaycan Respublikasının vətəndaşları müsabiqə əsasında qəbul olunurlar.

Doktoranturaya (dissertanturaya) qəbul üçün aşağıdakı sənədlər təqdim edilir:

1. Ərizə (ali təhsil müəssisəsinin rektorunun adına yazılır).

2. Kadrların şəxsi qeydiyyat vərəqəsi.

3. Tərcümeyi-hal.

4. 3 ədəd fotoşəkil (3x4 sm ölçüdə).

5. İş yerindən xasiyyətnamə.

6. İş stajı olanlar üçün əmək kitabçasından çıxarış.

7. Çap olunmuş elmi işlərin siyahısı və ya seçilmiş ixtisas üzrə referat.

8. Ali təhsil müəssisəsini bitirmək və elmi dərəcə olması haqqında diplomun müvafiq qaydada təsdiq edilmiş surəti (xarici ölkələrdə təhsil almış Azərbaycan Respublikasının vətəndaşları üçün təhsil haqqında sənədlərin tanınması barədə şəhadətnamə) və diploma əlavə (qiymət cədvəlindən çıxarış).

9. Şəxsiyyəti təsdiq edən sənədin surəti.

Diplomun əsli, şəxsiyyət vəsiqəsi  və hərbi bilet (çağırışçı vəsiqəsi) şəxsən təqdim edilir.

Fəlsəfə doktoru proqramı üzrə doktoranturaya qəbul olmaq iddiasında olanlar ixtisas fənnindən, xarici dildən (rus dili istisna olmaqla) və fəlsəfədən ali təhsil pilləsinin magistratura səviyyəsinin tədris proqramları çərçivəsində  qəbul imtahanları verməlidirlər (dissertanturaya qəbul istisna olmaqla).

Sənədlər 27 dekabr 2017-ci il tarixdən 19 yanvar 2018-ci il tarixədək ADNSU-nun əsas binasında  (Bakı, Azadlıq prospekti, 34) 248-ci otaqda, həftənin I-VI günləri saat  9.00 –18.00-a  kimi qəbul edilir. Qəbul imtahanları (ixtisas fənnindən, xarici dildən və fəlsəfədən)  2018-ci il yanvarın 22-dən fevralın 20-dək keçiriləcəkdir.

Qəbul  qaydaları  haqqında   ətraflı   məlumat   almaq   istəyənlər  ADNSU-nun doktorantura  şöbəsinə (Bakı, Azadlıq prospekti, 34, 2-ci mərtəbə, otaq 248, tel: (012)493-46-24) müraciət edə bilərlər.

REKTORLUQ