"Akkord" Korporasiyasının Türkiyədə yerləşən  filialı  bu ölkədəki fəaliyyətini genişləndirməkdə  davam etdirir.  Bu günlərdə şirkət ölkənin şərq bölgəsində- Mardin şəhərində irimiqyaslı su-kanalizasiya tikintisi layihəsinin icrası üzrə yeni müqaviləyə imza atıb.

"Mardin şəhərinin tullantı suları  kanalizasiya şəbəkəsi-şimal və cənub kollektorları layihəsi" adlanan layihənin icrası Türkiyə Cümhuriyyətinin Çevrə və Şəhərçilik Nazirliyinin Avropa Birliyi Yatırımları Dairəsi Başqanlığı tərəfindən keçirilən 28 sentyabr 2015-ci il  tarixli tenderin nəticəsinə uyğun olaraq   "Akkord Sanayi İnşaat Yatırım  A.Ş."nin qurmuş olduğu ortaqlığa həvalə edilib.  Davam etdirilməkdə olan  3 layihəyə əlavə olaraq 4-cü layihə üzrə müqavilə 26  fevral 2016-cı ildə imzalanıb.

Müqavilənin dəyəri təxminən 80 milyon türk lirəsi həcmindədir. Layihənin 21 ay (630 gün) müddətində həyata keçirilməsi nəzərdə tutulur. 140 kilometrə yaxın müxtəlif ölçülü borulardan ibarət kanalizasiya şəbəkəsi ilə, 16 kilometr uzunluğunda boru xəttindən ibarət olan şimal kollektoru və 22 kilometr uzunluğunda borudan  inşa olunacaq cənub kollektorunun inşasını nəzərdə tutan layihənin icrası üçün hazırlıq işlərinə artıq start verilmişdir.

“Xalq qəzeti”