Prezident İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı problemlərinin həllinə kömək edirlər.

Azərbaycan Respublikası Baş Prokurorluğunun mətbuat xidmətindən  bildiriblər ki, mərkəzi icra hakimiyyəti orqanlarının rəhbərləri tərəfindən avqust ayında  şəhər və rayonlarda vətəndaşların qəbulu cədvəlinə  uyğun olaraq baş prokuror Zakir Qaralov avqustun 15-də saat 11:00-da Qazax Rayon Prokurorluğunun inzibati binasında növbəti qəbul keçirəcək. 

Qəbulda Qazax, Ağstafa, Tovuz, Şəmkir və Gədəbəy rayonlarında yaşayan vətəndaşlar iştirak edəcəklər.

Qəbula gəlmək istəyən vətəndaşların qeydiyyatı və Qazax rayonuna gəlmələrinin təşkili müvafiq rayon prokurorları tərəfindən həyata keçiriləcək.

Vətəndaşlar yaşadıqları ərazi üzrə rayon prokurorluqlarına yazılı və ya şifahi müraciət etməklə yanaşı Baş Prokurorluğun müraciətlərə baxılması idarəsinin 437-28-79 nömrəli telefonu və [email protected] elektron poçt ünvanı vasitəsilə də qəbula yazıla bilərlər.

AzərTAc