“Dördlər finalı”nın hakimləri məlumdur

Aprelin 24-26-da “Sərhədçi” İdman Olimpiya Mərkəzində keçiriləcək futzal üzrə UEFA kuboku yarışlarında oyunları idarə edəcək hakimlər artıq məlumdur. UEFA bu turnirdə hakimliyi İngiltərə, İtaliya, Portuqaliya və Sloveniya təmsilçilərinə həvalə etmişdir.

Xatırladaq ki, kubok uğrunda dörd komanda “Araz” (Azərbaycan), “Barselona” (İspaniya), “Dinamo” (Rusiya) və “Kayrat” (Qazaxıstan) klubları mübarizə aparacaqlar. Yarımfinalda “Araz”ın rəqibi “Barselona” olacaq, “Dinamo”isə “Kayrat”la görüşəcək.

Növbəti, 30-cu tur

Bu gün Topaz Premyer Liqasında növbəti, 30-cu turun oyunları keçiriləcəkdir. Turun mərkəzi görüşündə “İnter” və “Neftçi” futbolçuları “münasibətləri aydınlaşdıracaqlar.”  Qalan oyunlar isə bunlardır : “Bakı”-“Xəzər-Lənkəran”, “Sumqayıt”-“Simurq”, “Qəbələ”-AZAL, “Qarabağ”-“Rəvan”.

İyirmi doqquz turdan sonra turnir cədvəlinə inamla başçılıq edib qızıl medalları, demək olar, özünə təmin edən “Qarabağ”ın 64 xalı vardır. İkinci mövqedə olan “Neftçi” 54 xal toplamışdır, üçüncü pillədə irəliləyən “İnter” isə 51 xala malikdir.

Final: “Rabitə” - “Azəryol”

Qadın voleybol komandaları arasında Azərbaycan Superliqasında qızıl medalların taleyi “Rabitə” və “Azəryol” klubları arasında keçiriləcək final görüşləri seriyasında həll olunacaq. Bu, yarımfinal matçları seriyasından sonra məlum olmuşdur.

Finalın astanasında “Rabitə” voleybolçuları “Azərreyl”i ikinci oyunda da məğlubiyyətə uğratmışlar (3:0), “Azəryol” isə “İqtisadçı”dan güclü olmuşdur-3:1.

Üçncü yerin sahibi “İqtisadçı” və “Azərreyl” komandalarının rəqabətində müəyyənləşəcək.

Aprelin 14-də başlanacaq final görüşləri seriyasının necə nəticələnəcəyindən asılı olmayaraq, “Rabitə” və “Azəryol” növbəti mövsümdə Çempionlar Liqasında çıxış etmək hüququnu özlərinə təmin etmişlər. Bu turnirdə Azərbaycanın daha bir nümayəndəsi isə milli çempionatımızın üçüncü mükafatçısı olacaq.

Oqtay BAYRAMOV,

“Xalq qəzeti”