Azərbaycan Respublikasının Mərkəzi Bankı (“AMB”) “Dövlət satınalmaları haqqında” Azərbaycan Respublikasının Qanununa əsasən valyuta ehtiyatlarının tərkibində Asiya sabit gəlirli qiymətli kağızlar portfelinin idarə edilməsi üçün xarici menecerlərin seçilməsi məqsədilə

 AÇIQ TENDER ELAN EDİR

Tenderdə ehtiyatların idarəedilməsi sahəsində institusional müştərilərə xidmət göstərən, 31 dekabr 2013-cü il tarixə idarəetmədə olan aktivlərin ümumi həcmi 300 milyard ABŞ dolları səviyyəsindən aşağı olmayan, Asiya sabit gəlirli qiymətli kağızlar bazarında ən azı 3 illik fəaliyyət göstəriciləri olan, hazırda mərkəzi banklar və ya suveren fondların aktivlərini idarə edən maliyyə institutları iştirak edə bilərlər.

Tenderdə iştirak etməkdə marağı olan və 500 (beş yüz) ABŞ dolları məbləğində iştirak haqqının ödənilməsini təsdiq edən sənədi təqdim etmiş hər bir iddiaçıya tenderin əsas şərtlər toplusu elektron poçt və sifarişli məktub vasitəsilə göndəriləcəkdir. İştirak haqqı AMB-nin (SWİFT kod: NABZAZ2X) Federal Ehtiyatlar Bankında (SWIFT kod: FRNYUS33) 021088221 nömrəli hesabına ABŞ dollarında köçürülməlidir.

Tenderdə iştirak etməkdə marağı olan tərəflər aşağıdakı sənədləri sifarişli məktub və elektron poçt vasitəsilə 1 aprel  2014-cü il tarixdən gec olmayaraq təqdim etməlidirlər:

- tenderdə iştirak etmək üçün yazılı müraciət;

- iddiaçıya dair tələblərə uyğunluq barədə sənədlər və məlumatlar;

- iddiaçının hüquqi statusunu əks etdirən hüquqi sənədlərin (nizamnamə, dövlət qeydiyyatı haqqında şəhadətnamə və ya reyestrdən çıxarış və s.) müvafiq qaydada təsdiq edilmiş surətləri;

- iddiaçının auditor rəyi ilə təsdiq olunmuş son maliyyə hesabatı;

- tender sənədləri və müqaviləni imzalamaq hüququ olan şəxsin səlahiyyətlərini təsdiq edən sənəd.

İddiaçı tender təklifini 10 aprel 2014-cü il Bakı vaxtı ilə saat 15.00-dan gec olmayaraq AMB-yə (R.Behbudov küçəsi, 32, Bakı AZ1014, Azərbaycan) təqdim etməlidir. Tender təklifi ilə birgə tender təklifinin təminatı bank zəmanəti formasında əsas şərtlər toplusunda göstərilən məbləğdə və tərzdə təqdim olunmalıdır.

Tender təklifləri olan zərflərin açılması iddiaçıların istəyi əsasında qanuni təmsilçi və ya vəkalətli nümayəndələrinin  iştirakı ilə 11 aprel 2014-cü ildə Bakı vaxtı ilə saat 11.00-da AMB-nin inzibati binasında keçiriləcəkdir.

Tender qaliblərinin seçilməsi menecerin risklərə adekvat davamlı müsbət gəlirin əldə edilməsi bacarığının ümumi qiymətləndirilməsinə əsaslanacaqdır. Qiymətləndirmə menecerin investisiya fəlsəfəsi, investisiya prosesi və onların tətbiqi nəticəsində əldə olunmuş riskə adekvat müsbət gəliri əks etdirən göstəricilər, investisiya heyətinin və ümumilikdə təşkilatın təcrübəsi və stabilliyi, eyni zamanda, idarəetmə üzrə xidmət haqqı səviyyəsinə əsaslanacaqdır. Menecerlər tərəfindən investisiya prosesinin diversifikasiyası, AMB-nin işçilərinə təlimlərin verilməsi və biliklərin ötürülməsi də qiymətləndirmə zamanı nəzərə alınacaqdır.

Əsas şərtlər toplusuna dair suallar [email protected] elektron ünvanına və ya (994 12) 498-03-63 nömrəli faksa, bazar əməliyyatları departamentinin direktoru Nigar Məmmədovaya ünvanlana bilər.

Portfelin idarə edilməsinə satınalma müqaviləsində müəyyən ediləcək tarixdən etibarən başlanacaqdır.

AMB haqqında məlumatları AMB-nin rəsmi saytından (www.cbar.az) əldə etmək olar.

Tender komissiyası