Azərbaycan Respublikasının Prezidenti yanında Dövlət Qulluğu Məsələləri üzrə Komissiya (DQMK) oktyabrın 4-də, 25-də, noyabrın 5-də və 20-də 95 dövlət orqanında inzibati vəzifələrin beşinci - yeddinci təsnifatlarına uyğun olan 1046 vakant dövlət qulluğu vəzifəsinin tutulması üçün müsabiqə elan etmişdir. Oktyabrın 4-də elan edilmiş müsabiqə üzrə qeydiyyat noyabrın 4-də, oktyabrın 25-də elan edilmiş müsabiqə üzrə qeydiyyat noyabrın 25-də başa çatmışdır. Noyabrın 5-də elan edilmiş müsabiqə üzrə qeydiyyat dekabrın 4-də, noyabrın 20-də elan edilmiş müsabiqə üzrə qeydiyyat isə dekabrın 19-da başa çatacaqdır.

Dövlət Komissiyasından AzərTAc-a bildirmişlər ki, müsabiqənin test imtahanı dekabrın 3-də başlayacaqdır. Test imtahanlarının keçirilmə ardıcıllığı ilkin mərhələdə inzibati vəzifələrin 5-ci təsnifatı üzrə, sonrakı mərhələdə isə inzibati vəzifələrin 6-7-ci təsnifatları üzrə nəzərdə tutulmuşdur. Test imtahanının cədvəli komissiyanın internet saytında (www.dqmk.gov.az) yerləşdirilmişdir. Həmin cədvəldə namizədlər iddia etdikləri vakant inzibati vəzifə üzrə nəzərdə tutulmuş test imtahanının tarixini və vaxtını seçməklə öz adlarını tapa bilərlər.

Test imtahanının kompyuter vasitəsilə keçirilməsini təmin edən “Dövlət qulluğuna qəbul - Test imtahanı” sistemi haqqında məlumatın videotəqdimatı komissiyanın internet saytında yerləşdirilmişdir.

Müsabiqənin test imtahanı mərhələsi zamanı namizədlərin Azərbaycan dili, tarixi, coğrafiyası, mədəniyyəti və ölkəmizin müasir beynəlxalq münasibətləri, qanunvericilik, informasiya texnologiyaları, məntiqi düşünmə qabiliyyəti sahələri üzrə bilikləri yoxlanılacaqdır.

Namizədlərin imtahana daha yaxşı hazırlaşması üçün komissiyanın tərtib etdiyi test imtahanı proqramları və metodiki vəsait, eləcə də onların tərtib edilməsində istifadə olunan ədəbiyyat siyahısı DQMK-nın internet saytında yerləşdirilmişdir.

Test imtahanlarının nəticələri imtahan başa çatdıqdan dərhal sonra namizədlərə təqdim ediləcəkdir. Eyni zamanda, nəticələr komissiyasının rəsmi internet saytında da yerləşdiriləcəkdir.