Prezident İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə kömək edirlər.

Növbəti belə qəbul avqustun 5-də  gənclər və idman naziri Azad Rəhimov tərəfindən Qəbələdə keçirilmişdir.

Qəbələ Mədəniyyət Mərkəzində keçirilən qəbulda Qəbələ, Oğuz, Şəki, Qax, Zaqatala, Balakən və İsmayıllı rayonlarının sakinlərinin şikayət və təklifləri dinlənilmişdir.

Gənclər və İdman Nazirliyinin aparat rəhbəri və şöbə müdirlərinin də iştirak etdikləri qəbulda vətəndaşların səsləndirdikləri müraciət və şikayətlərlə əlaqədar aidiyyəti qurumların rəhbərlərinə müəyyən göstəriş və tapşırıqlar verilmişdir.

Vətəndaşlardan əksəriyyəti güzəştli ipoteka krediti əldə etmək və idman sahəsində fəxri ad almaq üçün köməklik göstərilməsini xahiş etmişdir. Həmçinin müraciətlərin bir qismi rayonlarda gənclər mərkəzlərinin tikintisi, idman bölmələrinin açılması, zalların və meydançaların inşası, gənclərlə iş sahəsində QHT-lərin yaradılmasına dəstək vermək, sahibkarlıq fəaliyyəti üçün güzəştli kredit almaq, işə düzəlmə və digər şəxsi məsələlərlə bağlı olmuşdur.

Vətəndaşların Gənclər və İdman Nazirliyinə aid olan müraciətlərindən bəziləri elə yerindəcə həllini tapmışdır.

Nazir Azad Rəhimov digər məsələlərin nazirlikdə araşdırılaraq vətəndaşların müraciətlərinin müsbət həlli üçün müvafiq tapşırıqlar vermişdir. Aidiyyəti üzrə olmayan müraciətlər isə müvafiq qurumlara çatdırılması üçün qeydiyyata alınmışdır.

Vətəndaşlar onlar üçün yaradılmış şəraitdən razılıqlarını bildirmişlər.

Qəbuldan sonra gənclər və idman naziri Azad Rəhimov Qəbələ, Oğuz, Şəki, Qax, Zaqatala, Balakən və İsmayıllı rayonlarının gənclər və idman idarələrinin rəisləri ilə görüşmüş, onlara qəbulun yekunları ilə bağlı müvafiq tapşırıqlar vermişdir.

AzərTAc