Vergilər Nazirliyi vətəndaşların hüquqlarının qorunması, vergi ödəyicilərinin vergidən yayınmasının qarşısının alınması məqsədilə əmək müqavilələrinin bağlanılması və əmək haqqlarının leqallaşdırılması məsələlərini diqqət mərkəzində saxlayaraq bu istiqamətdə ardıcıl nəzarət tədbirlərini həyata keçirməkdədir.
Bildiririk ki, əmək haqlarının leqallaşdırılması ilk növbədə vətəndaşların sosial maraqlarının təmin olunmasına yönəlmişdir və vətəndaşlar işəgötürənlər tərəfindən onlara ödənilən qeyri-rəsmi əmək haqları ilə razılaşmaqla özlərini gələcəkdə dövlətin sosial təminatından məhrum etmiş olurlar. Əmək haqqını qeyri-rəsmi alan işçilər məzuniyyət haqqının, xəstəlik və işdənçıxma müavinətinin tam həcmdə ödənilməməsi ilə rastlaşır, ipoteka və digər kreditləri almaq hüququndan və ən əsası gələcəkdə layiqli pensiya təminatından məhrum olurlar.
İşəgötürəndən əmək müqaviləsi bağlamağı və əmək haqqını rəsmi ödəməyi tələb etməklə hər bir vətəndaş özünün firavan gələcəyini indidən düşünmüş olacaq. Unutmayın ki, rəsmi ödənilən əmək haqları - sabah üçün sabit sosial təminatınızın təməlini qoyur.

VERGİLƏR NAZİRLİYİ