Azərbaycan Respublikasının Prezidenti İlham Əliyevin müvafiq göstəriş və tövsiyələrinə uyğun olaraq gənclər və idman naziri Azad Rəhimov Şirvan şəhərində vətəndaşları qəbul etmişdir.

Qəbulda Şirvan şəhərindən, Hacıqabul, Neftçala, Saatlı, Sabirabad və Salyan rayonlarından vətəndaşlar iştirak etmişlər.

Vətəndaşların əksəriyyətinin müraciəti güzəştli ipoteka krediti və idman sahəsində fəxri adların verilməsi ilə bağlı olmuşdur. Digər vətəndaşlar isə rayonlarda gənclər mərkəzinin, idman zallarının və meydançaların tikintisi, idman bölmələrinin açılması, gənclərlə iş sahəsində QHT yaradılmasına dəstək, sahibkarlıq fəaliyyəti üçün güzəştli kredit almaq, işə düzəlmə və s. məsələlərlə bağlı müraciətlər etmişlər.

Vətəndaşların nazirliyə aid müraciətlərindən bəziləri yerindəcə həllini tapmış, digər təkliflər isə müvafiq qurumlara çatdırılmaq üçün qeydə alınmış və nəzarətə götürülmüşdür.

Nazir Azad Rəhimov Şirvan şəhərinin, Hacıqabul, Neftçala, Saatlı, Sabirabad və Salyan rayonlarının gənclər və idman idarələrinin rəisləri ilə də görüşmüşdür. Tədbirdə həmin qurumların fəaliyyəti müzakirə olunmuşdur.

Daha sonra nazir Şirvan şəhərində inşa edilən Olimpiya İdman  Kompleksində olmuş, tikinti-quraşdırma işlərinin gedişi ilə maraqlanmışdır.