Azərbaycan Respublikasının Əmək və Əhalinin Sosial Müdafiəsi Nazirliyi “Sosial xidmət haqqında” Azərbaycan Respublikası Qanununun tətbiqi məqsədilə Azərbaycan Respublikası Nazirlər Kabinetinin “Sosial xidmət sahəsində dövlət sifarişlərinin bələdiyyələrə, fiziki və hüquqi şəxslərə, o cümlədən qeyri-hökumət təşkilatlarına verilməsi qaydasının” təsdiq edilməsi haqqında 30 dekabr 2012-ci il tarixli 330 nömrəli qərarına müvafiq olaraq sosial xidmət sahələri üzrə sifarişlərin verilməsinə başlamışdır.

“Sağlamlıq imkanları məhdud uşaqlara və sosial təhlükəli vəziyyətdə olan yetkinlik yaşına çatmayanlara sosial xidmət göstərilməsi sahəsində əlavə tədbirlər haqqında” Azərbaycan Respublikası Prezidentinin 9 yanvar 2013-cü il tarixli 2653 nömrəli Sərəncamına əsasən Azərbaycan Respublikası Əmək və Əhalinin Sosial Müdafiəsi Nazirliyinə ayrılmış vəsait çərçivəsində 2013-cü ilin may-dekabr ayları üzrə müsabiqələr keçirilir:

1.Bakı, Sumqayıt, Gəncə, Şəki şəhərlərində və Xaçmaz rayonunda yaşayan sağlamlıq imkanları məhdud uşaqların sosial reabilitasiyasi (təkliflər 10 may 2013-cü il saat 11.00-dan gec olmayaraq təqdim edilməlidir, müsabiqə 10 may 2013-cü il saat 15:00-da keçiriləcəkdir.);

2.Şəmkir, Zaqatala və Biləsuvar rayonlarında sağlamlıq imkanları məhdud uşaqlar üçün icma  əsaslı sosial reabilitasiya mərkəzlərinin yaradılması (təkliflər 13 may 2013-cü il saat 11.00-dan gec olmayaraq təqdim edilməlidir, müsabiqə 13 may 2013-cü il saat 15:00-da keçiriləcəkdir.);

3.Sağlamlıq imkanları məhdud uşaqlar üçün 10 rayonda (Ağdaş, Ağsu, Göyçay, İsmayıllı, Qəbələ, Qobustan, Oğuz, Şamaxı, Ucar və Mingəçevir) səyyar reabilitasiya xidmətlərinin göstərilməsi (təkliflər 13 may 2013-cü il saat 11.00-dan gec olmayaraq təqdim edilməlidir, müsabiqə 13 may 2013-cü il saat 15:00-da keçiriləcəkdir.);

4.Uşaqlar (7 yaşadək) arasında əlilliyin qarşısının alınması  və sağlamlıq imkanları məhdud uşaqların portec metodikası ilə sosial reabilitasiyası (Xızı, Şabran, Siyəzən və Quba) (təkliflər 14 may 2013-cü il saat 11.00-dan gec olmayaraq təqdim edilməlidir, müsabiqə 14 may 2013-cü il saat 15:00-da keçiriləcəkdir.);

5.sağlamlıq imkanları məhdud uşaqların (daun sindromlu) sosial reabilitasiyası (təkliflər 14 may 2013-cü il saat 11.00-dan gec olmayaraq təqdim edilməlidir, müsabiqə 14 may 2013-cü il saat 15:00-da keçiriləcəkdir.);

6.sağlamlıq imkanları məhdud uşaqların (autizm sindromlu) sosial reabilitasiyası (təkliflər 14 may 2013-cü il saat 11.00-dan gec olmayaraq təqdim edilməlidir, müsabiqə 14 may 2013-cü il saat 15:00-da keçiriləcəkdir.).

Müsabiqələrdə iştirak etmək istəyən bələdiyyələr, fiziki və hüquqi şəxslər, qeyri-hökumət təşkilatları (bundan sonra təşkilatlar) müsabiqənin əsas şərtlər toplusunu və texniki tapşırığı əldə etmək üçün sifarişçinin  elektron ünvanına ([email protected]) müraciət edərək sənədin elektron nüsxəsini və yaxud, sifarişçinin S. Əsgərova  küçəsi 85, 305 nömrəli otaqda yerləşən ofisindən sənədin  çap edilmiş nüsxəsini saat 10:00-dan 17:00-dək əldə edə bilərlər.

Müsabiqələrdə iştirak etmək istəyən təşkilatlar müvafiq təcrübəyə, maddi-texniki bazaya və işçi potensialına malik olmalıdırlar. Müsabiqələrdə iştirak etmək istəyən təşkilatların ixtisas göstəricələrinə dair tələblər, müsabiqə üzrə sənədlərin hazırlanması, təqdim olunması qaydaları və sair haqqında ətraflı məlumat əsas şərtlər toplusunda öz əksini tapmışdır.

Müsabiqələr Əmək və Əhalinin Sosial Müdafiəsi Nazirliyində (6-cı mərtəbə, 611 № li otaq) keçiriləcəkdir.

Azərbaycan Respublikası Əmək və Əhalinin Sosial Müdafiəsi Nazirliyi Bakı şəhəri, AZ 1009, S. Əsgərova küçəsi 85 Tel: +994-12-5419727 Elektron poçt ünvanı: [email protected] ailto:[email protected]