Azərbaycan Respublikasının Mərkəzi Bankı bildirir ki, Mərkəzi Bankın “Kredit ittifaqına bank əməliyyatı aparmaq üçün xüsusi razılıq (lisenziya) verilməsi Qaydaları”nın 6.6.4, 6.4.9 və 6.4.10-cu bəndlərini əsas tutaraq edilmiş rəsmi xəbərdarlıqlara baxmayaraq, mütəmadi  olaraq qanunvericilik aktlarının  və Mərkəzi Bankın  normativ  xarakterli  aktlarının  tələblərinin pozulmasına və həmin halların aradan qaldırılmamasına görə Masallı rayonu, Tatyan kəndində “Tatyan” Kredit İttifaqı məhdud məsuliyyətli cəmiyyətə məhdud bank fəaliyyətinin aparılması üçün verilmiş 4 may 2004-cü il tarixli 161-Kİ saylı, həmçinin, göstərilənlərdən əlavə hesabatların üzürsüz səbəbdən ardıcıl olaraq iki hesabat tarixinə təqdim olunmamasına görə Ağdam rayonu, Yüzbaşılı kəndində yerləşən “Yüzbaşılı-2" Kredit İttifaqı məhdud məsuliyyətli cəmiyyətə məhdud bank fəaliyyətinin aparılması üçün verilmiş 10 noyabr 2005-ci il tarixli 179-Kİ saylı xüsusi razılıqlar (lisenziyalar) Mərkəzi Bankın İdarə Heyətinin 11 mart 2013-cü il tarixli 06 №-li qərarı ilə ləğv edilmişdir. Qərar dərc edildiyi gündən 10 gün keçdikdən sonra qüvvəyə minir. Qərar qüvvəyə mindiyi gündən otuz gün müddətində maraqlı şəxs tərəfindən aidiyyatı üzrə Azərbaycan Respublikası İnzibati-İqtisadi məhkəməsinə şikayət verilə bilər.

Xüsusi razılığı (lisenziyası) ləğv edilmiş kredit ittifaqlarına ləğvetmə komissiyasının yaradılması və müvafiq  ləğvetmə işlərinin aparılması tapşırılmışdır.