Heydər Əliyev Mərkəzi Azərbaycan xalqının ümummilli lideri Heydər Əliyevin 90 illik yubileyi ilə əlaqədar istedadlı gənclər arasında “Azərbaycanımla fəxr edirəm” adlı yazı müsabiqəsi elan edir.

Heydər Əliyev Mərkəzindən AzərTAc-a bildirmişlər ki,  müsabiqəyə təqdim olunan məqalələr Azərbaycanın müxtəlif sahələrdəki nailiyyətləri, ölkənin  inkişafında gənclərin rolu, bu istiqamətdə gənclərin verə biləcəyi töhfələrlə bağlı olmalıdır.

Azərbaycan gənci bütün bu sahələrdə fikir və təkliflərini “Azərbaycanımla fəxr edirəm” adlı məqalədə bölüşə və qalib ola bilər.

Müsabiqəyə bu vaxta qədər dərc olunmamış yazılar qəbul olunur.

Müsabiqəyə göndərilən məqalələr araşdırma xarakterli olmalıdır. Məqalələr 12 ölçülü Times New Roman şriftində, 5-6  min çap işarəsindən az olmamaqla təqdim edilməlidir.

Məqalənin sonunda yazının bu müsabiqəyə təqdim edildiyi göstərilməli, müəllifin adı, soyadı, elektron poçt ünvanı, əlaqə telefonları qeyd olunmalı, müəllifin şəxsiyyətini təsdiq edən sənədin surəti əlavə edilməlidir.

Elektron poçt vasitəsilə göndərilən məqaləyə şəxsiyyəti təsdiq edən sənədin foto-surətinin elektron versiyası əlavə olunmalıdır.

Müsabiqəyə məqalələr bu il martın 27-dən aprelin 27-dək Heydər Əliyev Mərkəzinə (ünvan: Bakı şəhəri, Heydər Əliyev prospekti) və ya Mərkəzin [email protected], yaxud  [email protected] elektron poçt ünvanlarına göndərilməlidir.

 Qaliblərə mükafatlar təqdim olunacaqdır. Müsabiqədə birinci yerin qalibi 1 ədəd noutbuk və 1 illik internet paketi, ikinci yerin qalibi 1 ədəd masaüstü kompyuter və 1 illik internet paketi, üçüncü  yerin qalibi 1 ədəd planşet kompyuter və 1 illik internet paketi ilə mükafatlandırılacaqdır.

Müsabiqədə fərqlənən daha 20 nəfərə həvəsləndirici mükafat - mini planşet kompüterlər təqdim olunacaqdır.

Müsabiqə ilə bağlı suallar Heydər Əliyev Mərkəzinin                         (+994 12) 505 60 01 əlaqə telefonunda cavablandırılır.