Yanvarın 24-də “6/40” lotereyasının 200-cü tirajını canlı yayımda izləyən “Space” telekanalının tamaşaçıları 149 745 manat məbləğində rekord uduşun şahidləri oldular. Əlbəttə, çox sanballı uduşdur.  Lakin lotereya uduşları təkcə rekord məbləğlərdən ibarət deyil.

Bir anlıq təsəvvür edin ki, balaca oğlunuzla gəzməyə çıxmısınız və lotereya satış məntəqəsinin yanından keçərkən, sanki daxili bir səs sizə deyir ki, lotereya bileti al, buradaca bəxtini sına. Siz də bir ani lotereya bileti alırsınız və nə az, nə çox, 30 000 manat pul udursunuz. Nə edərsiz? Çətin sualdır, deyilmi? Biz bu sualla belə xoşbəxt anı real olaraq “Sprint” lotereyası ilə yaşamış bir həmvətənimizə, Bakı şəhər sakini Cəfərov İlham Kazım oğluna müraciət etdik. “Əvvəlcə gözlərimə inanmadım, sonrasını isə sözlə ifadə edə bilmirəm” deyir. 30 yaşlı 3 övlad atası üçün “göydəndüşmə” 30 000 manatın nə olduğunu təsəvvür etmək çətin deyil. Biz də onun sevincinə şərik çıxır, xeyirli olsun deyirik!

Lotereyasevənlər arasında ən populyar oyunlardan biri olan “5/36” lotereyasında isə 124 775 manatadək yüksəlmiş “Cek Pot”u “fəth etmək üçün hücumlar” davam etməkdədir. Lotereyanın 598-ci tirajında Zərdab sakini Əhmədov Azər Eldar oğlu “Cek Pot”un bir addımlığında dayanaraq 3750 manatla kifayətlənməli oldu. Onun ardınca, yəni artıq 599-cu tirajda Əliyev Kamil Şamil oğlu eyni vəziyyətlə üzləşərək 3450 manata sahib oldu. 60 yaşlı Kamil Əliyev lotereyaların, xüsusən “5/36”-nın daimi iştirakçısıdır. Bir ilə yaxındır ki, bir neçə variantda rəqəm kombinasiyalarını dəyişmədən qeyd edir və bundan sonra da dəyişməyəcəyini bildirir.  Onun “uduşdan 12 nəvəmin hərəsinə 100 manat verəndə alacağım ləzzəti heç nə verə bilməz” sözləri ilə razılaşmamaq olmur.

“5/36” lotereyasının son tirajlarında da iştirakçılar “Cek Pot”u udmağa çox yaxın oldular.  602-ci tirajda Sumqayıt şəhər sakini Əlizadə Ramin Bulud oğlu 2100 manata və 603-cü tirajda Bakı sakini İsmayılov Mehdi İsmayıl oğlu 3453 manata sahib oldular. Nəhayət, yenicə lotereya həvəskarlarının ixtiyarına verilmiş “Qızıl Onluq” lotereyası qalibləri də öz uduşlarını almağa başlayırlar. Bu oyunun 2-ci tirajında Bakı şəhər sakini Əliyev Firudin Əli oğlu “Kia Rio” avtomobilinə sahib oldu.

Yeni lotereyalardan danışarkən “Binqo+8" və ”Bahar Sevincləri" kimi unikal layihələri xüsusi qeyd etmək lazımdır. Artıq yaxın günlərdə satışa buraxılacaq “Binqo+8" lotereyasının tirajı 8 martda keçiriləcək və ”Space" kanalı vasitəsi ilə canlı yayımlanacaq. Əziz xanımların bayramını daha da rövnəqləndirəcək bu unikal oyunda 8 ədəd Chevrolet “Aveo” avtomobili oynanılacaq. Hər turunda bir ədəd avtomobil oynanılan, 5 turdan ibarət olan oyunun əvvəlində bir və əsas oyun bitdikdən sonra iki 100% uduşlu Chevrolet “Aveo” avtomobilləri biletin seriya nömrəsi ilə oynanılır.

 2013-cü ilin fevralında satışa çıxarılacaq “Bahar Sevincləri” lotereyasının tirajı isə, “Novruz” bayramı axşamı, 20 mart 2013-cü ildə keçiriləcək. Bu oyun da “Space” kanalı vasitəsi ilə canlı yayımlanacaq. Çoxsaylı sanballı pul uduşlarının oynanıldığı “Bahar Sevincləri” lotereyasında 100% uduşlu Nissan “Juke”, Chevrolet “Aveo” və Kia “Rio” avtomobilləri  biletin seriya nömrəsi ilə oynanılır. “100% uduşlu” PR sloqanı deyil və o deməkdir ki, lototrondan çıxan rəqəmlər satılmamış lotereya biletinin nömrəsinə təsadüf etdiyi halda şarlar yenidən lototrona qaytarılır, yeni uduşlu nömrə müəyyən edilir və bu proses avtomobil iştirakçılar tərəfindən udulanadək davam edir.

 O ki qaldı rekord uduşa, yeri gəlmişkən, “Klassik loto” və “Binqo” lotereyalarında əsas uduşlar 150 000 manatı üstələyirlər və böyük ehtimalla demək olar ki, rekord uzunömürlü olmayacaq. Lotereya həvəskarlarını daha iri məbləğdə uduş, yeni rekord gözləyir. Qoy bu rekord da Sizə məxsus olsun!