Milli Televiziya və Radio Şurasının (MTRŞ) dekabrın 21-də keçirilən iclasında regional radio yayım proqramının açılması üçün Gəncə və ətraf ərazilərdə radio üzrə 93.3 MHz işçi tezliyinə elan edilmiş müsabiqənin nəticələrinə, “Lider” TV və “Radio-Azərbaycan” MMC-nin televiziya və əlavə informasiya yayımı üçün xüsusi razılıq (lisenziya) müddətinin uzadılmasına dair müraciətə baxılmışdır.

MTRŞ-dən AzərTAc-a bildirmişlər ki, müsabiqədə 3 iddiaçı - “Kəpəz Müstəqil Teleradio Şirkəti” MMC, “Türkel TV” MMC və “Yevlax TV” MMC iştirak etmişdir.

MTRŞ-nin qərarına əsasən “Televiziya və radio yayımı haqqında” Azərbaycan Respublikası Qanununun 15.5-ci maddəsinə uyğun olaraq müsabiqədə iştirak edən digər iddiaçılarla müqayisədə daha münasib maddi-texniki bazaya, peşəkar kadr potensialına, maraqlı və bu gün üçün aktual olan yayım konsepsiyasına malik  olduğuna görə  “Kəpəz Müstəqil Teleradio Şirkəti” MMC regional radio yayım proqramının açılması üçün müsabiqənin qalibi elan edilmiş və ona 6 il müddətinə Gəncə və ətraf ərazilərdə radio yayımı üçün xüsusi razılıq (lisenziya) verilməsi barədə qərar qəbul  edilmişdir.

Həmçinin iclasda “Televiziya və radio yayımı haqqında” Azərbaycan Respublikası Qanununun 22.3-cü maddəsinə əsasən “Lider TV və Radio-Azərbaycan” MMC-nin televiziya və əlavə informasiya yayımı üçün xüsusi razılıq (lisenziya) müddətinin daha 6 il uzadılması barədə qərar qəbul olunmuşdur.