“Bakcell” MMC öz abunəçilərinin nəzərinə çatdırır ki, şirkət tərəfindən təqdim olunan danışıq kartlarının (ödəmə və balansartırma) qiymətində heç bir dəyişiklik edilməyib. “Bakcell” MMC tərəfindən abunəçilərə əvvəllər olduğu kimi 1, 2, 5, 6, 10, 20, 40, 100 AZN nominal dəyərində ödəmə kartları təklif olunur. Qiymətlərin aydın və anlaşıqlı olması üçün hər bir kartın dəyəri onun üzərində qeyd olunur. Ölkə ərazisində “Bakcell” MMC-nin danışıq kartlarının realizəsi ilə məşğul olan 10 000-dən artıq müstəqil satış nöqtəsi vardır. Bu satıcılar müvafiq danışıq kartlarını “Bakcell” MMC-nin distribyuterlərindən əldə edərək faktiki istifadəçilərə satırlar. Müstəqil surətdə fəaliyyət göstərən həmin  satıcılar tərəfindən qiymətlərin süni şəkildə artırılmasının “Bakcell” MMC şirkətinə heç bir aidiyyəti yoxdur və müvafiq kartların üzərində qeyd olunmuş nominaldan artıq  qiymətə satılması ilə əlaqədar  “Bakcell” MMC məsuliyyət daşımır. Şirkət bildirir ki, abunəçilər istifadə etdikləri nömrələrin balansını həmçinin digər alternativ yollar - ödəmə nöqtəsi (PayPoint), poçt, bank və ATM vasitəsilə də artıra bilərlər.