Çin
Hərbi büdcə yüksəlir
2012-ci ildə Çinin hərbi büdcəsi 670,27 milyard yuan (106,41 milyard dollar) təşkil edəcək. Bu, keçən illə müqayisədə 11,2 faiz çoxdur. Qeyd edək ki, 2011-ci ildə ölkənin hərbi büdcəsi əvvəlki ilə nisbətən 12,7 faiz çox olmuşdu.
Xəbəri Sinxua agentliyi verib.

Cənubi Koreya
Qızıl ehtiyatları artıb
Fevralın sonuna Cənubi Koreyanın qızıl ehtiyatlarının həcmi 315,8 milyard dollar təşkil edib. Bildirilib ki, 1 ay ərzində ehtiyatlar 4,46 milyard dollar artıb. Qeyd edək ki, hazırda qızıl ehtiyatlarının həcminə görə, Cənubi Koreya dünyada 7-ci yerdə gedir. İlk 6 yeri Çin, Yaponiya, Rusiya, Tayvan, Braziliya və İsveçrə tuturlar.
Məlumatı CNN verib.

Avstriya
Mosartın əsəri tapılıb
Tirol şəhərində dahi Avstriya bəstəkarı Volfanq Amadey Mosartın bu vaxta qədər məlum olmayan əsəri tapılıb. Bəstəkar fortepiano pyesini 1780-ci ildə yazıbmış. Əsər tamaşaçılar qarşısında martın 23-də Mosartın vətəni Zalsburqda ifa ediləcək.
İnformasiyanı BBC yayıb.

Böyük Britaniya
Ev tapşırıqları ləğv edildi
Valideynlərin şikayətlərinə görə Böyük Britaniyada aşağı sinif şagirdləri üçün məcburi ev tapşırıqları ləğv edilib. Qanunvericiliyə əsasən 7-11 yaş arası uşaqların ev tapşırıqları yarım saatdan çox vaxt aparmamalıdır. Lakin valideynlər buna daha çox vaxt sərf olunduğunu iddia edirdilər.
Xəbəri Röyter agentliyi verib.

"Uşaq və göyərçin" satılacaq
"Kristi" hərracı Pablo Pikassonun "Uşaq və göyərçin" rəsmini satışa çıxarır. Əsərə 80 milyon dollar qiymət qoyulub. Qeyd edək ki, 2010-cu ildə Pikassonun "Çılpaq, yaşıl yarpaqlar və büst" rəsmi hərracda 106,5 milyon dollara satılmışdı.
Məlumatı RİA "Novosti" verib.

Belçika
"Yaxşı oğlan" qalib gəldi
Mons şəhərində 28-ci beynəlxalq kino festivalı başa çatıb. Əsas mükafata fin rejissoru Zayda Berqrotun çəkdiyi "Yaxşı oğlan" filmi layiq görülüb. Ən yaxşı aktyor həmin filmdə baş rolun ifaçısı Samuli Nittimyaki hesab edilib. "Ən yaxşı aktrisa" nominasiyasında Rusiyada çəkilmiş "Bədəvi" filmində baş rolun ifaçısı Olqa Simonova qalib gəlib.
İnformasiyanı "Alman dalğası" yayıb.

Hazırladı: Ayaz HƏMİDOĞLU, "Xalq qəzeti"