Azərbaycanın Topaz Premyer Liqasının ötən istirahət günlərinə təsadüf etmiş 18-ci turunda dörd görüşdən üçündə hakimlər eyni hesab qeydə almışlar –2:1.

Əgər “Kəpəz” Gəncə Şəhər Stadionunda “Səbail”i məğlubiyyətə uğradıb uzun fasilədən sonra pərəstişkarlarını 3 xalla seviindirə bilmişdirsə, turnir cədvəlinin ikinci-üçüncü pillələrində irəliləyən “Qəbələ” və “Zirə”yə “doğma divarlar” kömək etməmişdir. Bu klublar müvafiq surətdə “Neftçi” və “Keşlə”yə uduzmuşlar.

Turun daha çox maraq doğuran görüşündə isə “Sumqayıt” və “Qarabağ” meydanı eyni hisslərlə tərk etmişlər–1:1.

Bu turdan sonra lider “Qarabağ” xal ehtiyatını 45-ə çatdırmış, onun ən yaxın izləyiciləri “Qəbələ” və “Zirə”nin isə müvafiq surətdə 35 və 32 xalları var.

Növbəti, 19-cu turun oyunları martın 9-10-da keçiriləcəkdir: “Kəpəz”–“Qəbələ”, “Keşlə”–“Neftçi”, “Səbail”–“Sumqayıt”, “Qarabağ”–“Zirə”.

“Xalq qəzeti”