Avropa Voleybol Konfederasiyası qadın komandaları arasında Çempionlar Liqası turnirinin “Dördlər finalı”nı Rumıniyanın paytaxtı Buxarestdə keçirməyi qərara almışdır.

Tribunaları 5200 tamaşaçı tutan “Sala Polivalenta” stadionunda təşkil olunacaq yarışda Rumıniyanı “Alba” klubu təmsil edəcək. Görüşlər mayın 5-6-da keçiriləcək.

Tərkibində Azərbaycan milli komandasının voleybolçusu Natalya Məmmədovanın da çıxış etdiyi Rusiyanın “Dinamo” (Kazan) klubu da “Dördlər final”ının iştirakçısı ola bilər.

Dinamoçular qrup mərhələsini inamla başa vurub pley-offa vəsiqə qazanmışlar. Rusiya voleybolçuları bu mərhələdən də qalib ayrılsalar, Buxarestdə həlledici görüşlərdə oynayacaqlar. Onların pley-offda kiminlə görüşəcəyi isə bu gün məlum olacaq.

“Xalq qəzeti”