Beynəlxalq Şahmat Federasiyası (FİDE) 2018-ci il martın 1-nə olan vəziyyətə görə reytinq cədvəllərini dərc etdirmişdir. Planetin ən yaxşı 100 kişi şahmatçısının siyahısında Azərbaycan milli komandasının dörd üzvü də vardır.

Yalnız norveçli dünya çempionu Maqnus Karlsendən (2843) geri qalan Şəhriyar Məmmədyarov (2809) ikinci mövqeyi özündə saxlayır. Üçüncü pillədə rusiyalı Vladimir Kramnik (2800) irəliləyir.

Azərbaycanın digər şahmatçılarından Teymur Rəcəbov (2748) siyahıda 18-ci, Rauf Məmmədov (2709) 39-cu, Arkadi Naydiç (2701) 45-cidir.

Qeyd edək ki, Məmmədyarov və Kramnikin də iştirakçısı olacaqları dünya şahmat tacı uğrunda iddiaçıların turnirinə cəmi bir həftə qalır. Dünyanın  hər yerində böyük maraqla gözlənilən bu turnir martın 10-dan 28-dək Almaniyanın paytaxtı Berlində keçiriləcək. Onun qalibi noyabr ayında Londonda dünya tacı uğrunda matçda Karlsenlə görüşmək hüququ qazanacaq.

Oqtay BAYRAMOV,
“Xalq qəzeti”