Qadınlar arasında şahmat üzrə Azərbaycan çempionatının qızıl medalını FİDE ustası Xanım Balacayeva qazanmışdır.

Turnirdə bir dəfə də uduzmayan ölkə çempionu keçirdiyi doqquz görüşdən dördündə qalib gəlmiş, beşində isə rəqibləri ilə heç-heçəyə razılaşmışdır. Balacayeva finişə 6,5 xalla çatmışdır.

Gümüş mükafatçı Günay Məmmədzadə də çempionla eyni miqdarda xal toplamış, ancaq əlavə göstəricilərə görə ikinci yerlə kifayətlənməli olmuşdur.

Bürünc medalı isə iki qalibdən yarım xal geri qalan Gülnar Məmmədova qazanmışdır.

İyirmi şahmatçının çıxış etdiyi çempionatda dördüncü–altıncı yerləri hərəyə 5,5 xalla Zeynəb və Türkan Məmmədyarovalar və Nərmin Məmmədova bölüşdürmüşlər.

Oqtay BAYRAMOV,
“Xalq qəzeti”