Azərbaycan idmançıları Kiyevdə Ukraynanın görkəmli güləşçi və məşqçilərinin xatirəsinə həsr edilən sərbəst güləş, yunan-Roma və qadın güləşi üzrə XXII beynəlxalq turnirdə böyük uğurla çıxış etmişlər. Yarışda 31 nəfərlə mübarizəyə qoşulan təmsilçilərimiz 37 ölkədən 500-ə yaxın idmançının rəqabətində 19 medal–9 qızıl, 6 gümüş və 4 bürünc mükafat qazanmışlar.

Üstəlik də, Azərbaycan milli komandasının üzvləri Xocalı soyqrımının növbəti ildönümü ərəfəsində keçirilən yarışın gedişində erməni rəqiblərini beş görüşdə mübarizə meydanını məğlubiyyətlə tərk etməyə məcbur etmişlər.

Ukrayna paytaxtında ölkəmizə qızıl medalları “sərbəstlər” Georgi Edişeraşvili (57 kq), Əhmədnəbi Qvarzatilov (61 kq), Şərif Şərifov (92 kq), Nurməhəmməd Hacıyev (97 kq), yunan-Roma üsulu ilə güləşənlər Eldəniz Əzizli (55 kq), Murad Məmmədov (60 kq), Taleh Məmmədov (63 kq), Rafiq Hüseynov (82 kq) və qadın güləşçi Tatyana Omelçenko (62 kq) qazandırmışlar.

Oqtay BAYRAMOV,
“Xalq qəzeti”