Xəbər verdiyimiz kimi, bu günlər Kiyevdə Ukraynanın görkəmli güləşçi və məşqçilərinin xatirəsinə həsr edilmiş sərbəst güləş, yunan-Roma və qadın güləşi üzrə XXII beynəlxalq turnir keçirilir.

Azərbaycan idmançıları Ukrayna paytaxtına geniş heyətlə yola düşmüşlər. Yarışın birinci günü mübarizəyə qoşulan 18 təmsilçimizdən 7-si inamla çıxış edərək finala vəsiqə qazanmışdır.

“Sərbəstlər” Georgi Edişeraşvili (57 kq), Hacı Əliyev (65 kq), Nurməhəmməd Hacıyev (97 kq), yunan-Roma güləşi ustaları Eldəniz Əzizli (55 kq), Taleh Məmmədov (63 kq), Rafiq Hüseynov (82 kq) və qadın güləşçi İrina Netreba (65 kq) həlledici görüşlərdə qızıl medallar uğrunda mübarizə aparmaq hüququ qazanmışlar. Finallar bu gün axşam keçiriləcək.

Xatirə turnirinin bütün qalib və mükafatçıları sabah müəyyənləşəcək.

Oqtay BAYRAMOV,
“Xalq qəzeti”