Bu gün Koreya Respublikasının Pxençxan şəhərində sonuncu həftəsinə başlayan XXIII Qış Olimpiya Oyunlarında daha  bir ölkə medallarının  hesabını açmışdır. Üstəlik də, qızıl mükafatla.

Ukraynalı həmkarlarımızın böyük sevinclə qeyd etdikləri kimi, onların həmvətəni fristaylçı Aleksandr Abramenko xizəkçilik  akrobatikasının superfinalında fantastik nəticə ilə Olimpiadanın çempionu adını qazanmışdır.

İndi hesabında bir qızıl mükafat olan Ukrayna medalçı ölkələrin  siyahısında  17-ci pillədədir. Digər yaxın xaric ölkələrindən Belarus Respublikası (1 qızıl, 1 gümüş mükafat) 15-ci, Rusiya (3 gümüş, 8 bürünc medal) 11-ci, Qazaxıstan (1 bürünc mükafat) 25-ci yerləri tuturlar.

Cədvəlin ən yüksək pillələrində ciddi dəyişiklik baş vermişdir. Norveç medalların keyfiyyətinə görə uzun müddət liderlik etmiş Almaniyaya çatmış, sayına  görə isə ondan xeli irəli çıxmışdır. Norveş olimpiyaçıları 19 fevral startlarına 26 medalla (9 qızıl, 9 gümüş, 8 bürünc), almanlar isə 18 mükafatla (9+5+4) başlamışlar.

Medal qazanmış ölkələrin siyahısında birinci beşliyi Hollandiya (6+5+2), Kanada (5+5+6) və ABŞ (5+3+2) tamamlayırlar.

“Xalq qəzeti”