Azərbaycan idmançısı Dərya Farşbafşəhriyari bu il oktyabrın 6-dan 18-dək Argentinanın paytaxtı Buenos-Ayresdə keçiriləcək Yeniyetmələrin Olimpiya Oyunlarına vəsiqə qazanmışdır.

Təmsilçimiz Moskvada yenicə başa çatmış bədii gimnastika üzrə təsnifat turnirində fərqlənmişdir. Dərya 33 ölkə nümayəndələrinin iştirakı ilə keçirilmiş yarışda lent, həlqə, gürzlər və top ilə çıxışlarının yekununda 23,500 xal toplayaraq, 14-cü yeri tutmuşdur. Bu nəticə ona Buenos-Ayresə “bileti” təmin etmişdir.

Azərbaycan gimnastının müvəffəqiyyəti barədə məlumatı idman ictimaiyyətimizin diqqətinə çatdıran azerisport.com, həmçinin qeyd etmişdir ki, Moskva turnirindən Olimpiya
startlarına ən yaxşı 18 idmançı vəsiqə qazanmışdır.

Oqtay BAYRAMOV,
“Xalq qəzeti”