Koreya Respublikasında keçirilən 2018 Qış Olimpiya Oyunlarında yarışların birinci həftəsinə yekun vurulmuşdur. Olimpiadada medal qazanmış ölkələrin siyahısına əvvəlkitək Almaniya başçılıq edir.

Bu ölkənin idmançıları qızıl medalların sayını artıq 9-a çatdırmışlar. Lider komandanın hesabında həmçinin 2 gümüş və 4 bürünc, cəmi 15 mükafat vardır.

Medalların sayına görə isə birinci yeri Norveç tutur. Norveçlilər Olimpiada startlarında 17 dəfə fəxri kürsüyə dəvət olunmuşlar–6 qızıl, 7 gümüş və 4 bürünc mükafat.

Medalçı ölkələrin siyahısında birinci beşliyə həmçinin Hollandiya (5+5+2), ABŞ (5+1+2) və Kanada (4+5+4) daxildir.

Fevralın 15-də ispaniyalı Recino Ernandes snoubordçuların yarışlarında öz ölkəsinə bürünc medal qazandırdıqdan sonra XXIII Qış Olimpiya Oyunlarının mükafatlarına sevinmiş ölkələrin sayı 21-ə çatmışdır.

“Xalq qəzeti”