Azərbaycan təmsilçisi Patrik Braxner Koreya Respublikasının Pxençxan şəhərində gündən-günə sürətini artıran XXIII Qış Olimpiya Oyunlarında bu həftə yarış məsafəsinə dəvət olunacaq.

İdmançımız Olimpiadada ilk startına fevralın 18-də çıxacaq. Həmin gün Braxner böyük slalom yarışlarında mübarizə aparacaq. Bundan dörd gün sonra, fevralın 22-də Patrik bir daha ustalığını nümayiş etdirəcək. Bu dəfə slalom yarışlarında.

Bu növün nümayəndələrinin startlarının Yenpxen dağ xizəkçiliyi kurortunda təşkil olunacağını da qeyd edək.

İlk çempion

Pxençxan Olimpiadasında ilk qızıl medalı isveçli xizəksürən Şarlott Kolla qazanmışdır. O, fevralın 10-da qadınların skiatlon yarışlarının qalibi olmuş və Qış Olimpiya Oyunları tarixində özünə XXIII  Olimpiadanın ilk çempionu kimi yer etmişdir.

Oyunun qəhrəmanı –Alina Müller

Qış Olimpiya Oyunları proqramında böyük maraq doğuran yarışlardan biri, qadın xokkey komandalarının turniri İsveçrə millisinin Koreya birləşmiş komandası üzərində böyük hesablı qələbəsi ilə başa çatmışdır – 8:0.

Kvandon Universitetinin arenasında keçirilmiş oyunun qəhrəmanı 4 qolun müəllifi Alina Müller olmuşdur.

Bu turnirin  daha bir neçə oyunu belə nəticələnmişdir: İsveç – Yaponiya – 2:1, Kanada – Rusiya – 5:0, ABŞ – Finlandiya – 3:1.

Oqtay BAYRAMOV,
“Xalq qəzeti”