Belarus Teleqraf Agentliyinin (BELTA) fevralın 8-də, Koreya Respublikasının Pxençxan şəhərində XXIII Qış Olimpiya Oyunlarının açılış mərasimi ərəfəsində yaydığı xəbərə görə, Yaponiya idmançısı, xizəklərlə tramplindən tullanan Noriaki Kasai 8-ci dəfə Qış Olimpiadasında starta çıxır. Rəsmən elan olunmuşdur ki, o, səkkiz Qış Olimpiya Oyunlarında iştirak edən ilk idmançıdır.

Agentlik qeyd edir ki, 45 yaşlı N.Kasai indiyədək bu göstərici üzrə liderliyi rusiyalı kirşəsürən Albert Demçenko ilə bölüşürdü. Onların hərəsi yeddi qış Olimpiadasının iştirakçısı olmuşdu, lakin A.Demçenko artıq çıxışlarını başa vurmuş və Rusiya yığma komandasının baş məşqçisidir.

N.Kasai Olimpiya Oyunlarında ilk dəfə 1992-ci ildə çıxış edib, mükafatlar kolleksiyasında 2 gümüş və 1 bürünc medal var. Onun nailiyyəti Ginnesin rekordlar kitabına düşüb.

“Xalq qəzeti”