Bu günlər Sloveniyanın paytaxtı Lyublyanada futzal üzrə Avropa çempionatının final mərhələsinin görüşləri keçirilir. Qitə çempionu adı, habelə gümüş və bürünc medallar uğrunda 12 komanda mübarizə aparır.

Rəqiblər püşk nəticəsində dörd qrupa bölünmüşlər. Azərbaycan millisi İspaniya və Fransa yığmaları ilə birlikdə “D” qrupuna daxildir.

Qalan üç qrupun isə tərkibi belədir: “A”. Sloveniya, İtaliya, Serbiya. “B”. Rusiya, Qazaxıstan, Polşa. “C”. Portuqaliya, Ukrayna, Rumıniya.

Hər qrupdan ən yaxşı iki komanda dörddəbir finala çıxacaq. Fevralın 5-6-na təyin edilmiş dörddəbir final görüşlərinin qalibləri yarımfinalda (8 fevral) mübarizəni davam etdirəcəklər. Final və üçüncü yer uğrunda oyun fevralın 10-da keçiriləcəkdir.

Azərbaycanın futzal ustaları qrup mərhələsinə bu gün Fransa millisinə qarşı oyunla başlayacaq, bundan iki gün sonra isə ispanlarla görüşəcəklər.

Avropa çempionatına Sloveniya – Serbiya və Rusiya – Polşa görüşləri ilə start verilmişdir. Hər iki oyunda hakimlər heç-heçə qeydə almışlar – müvafiq surətdə 2:2 və 1:1.

Növbəti iki görüşdə Portuqaliya komandası Rumıniya yığmasına qalib gəlmiş – 4:1, İspaniya isə Fransa ilə heç-heçə oynamışdır – 4:4.

Bu gün çempionatda Azərbaycan – Fransa görüşü ilə yanaşı, Rumıniya – Ukrayna matçı da oynanılacaq.

Oqtay BAYRAMOV,
“Xalq qəzeti”