Bakının kişilərdən ibarət “Lokomotiv” komandası Avropa Voleybol Konfederasiyasının “Çağırış kuboku” yarışlarında fəxri mükafata doğru daha bir addım atmışdır.

Azərbaycan paytaxtı voleybolçuları bu dəfə 1/16 finalda Portuqaliyanın “Fonte Bastardo” klubunu turnirdə mübarizəni dayandırmağa məcbur etmişlər. Paytaxtımızda keçirilmiş ilk oyunda 3:1 hesabı ilə qələbə qazanan “Lokomotiv” Portuqaliyada cavab matçında üç hissədə uduzsa da, əlavə “qızıl” hissədə qalib gəlmişdir. Bununla da, təmsilçimiz iki oyunun ümumi yekununda Portuqaliya klubundan üstün olmuş və növbəti mərhələdə kubok uğrunda mübarizəni davam etdirmək hüququ qazanmışdır.

Səkkizdəbir finalda Azərbaycan klubunun rəqibi Yunanıstanın “Olimpiakos” komandası olacaq. İlk oyun gələn il yanvarın ortalarında Yunanıstanda keçiriləcəkdir.

Oqtay BAYRAMOV,
“Xalq qəzeti”