Dünya Kubokuna iddiaçıların sıraları seyrəlir

Tbilisidə şahmat üzrə Dünya Kuboku yarışında 1/32 final mərhələsinə yenicə yekun vurulmuş və bütün əsas mübarizə hələ irəlidədir. Amma artıq bir sıra məşhur qrossmeysterlər  mübarizəni dayandırmışlar.

Hindistanlı keçmiş dünya çempionu Vişvanatan Anand, dünya şahmat tacı uğrunda sonuncu matçda Maqnus Karlsenin (Norveç) rəqibi olmuş rusiyalı Sergey Karyakin, onun həmvətənləri Yevgeni Tomaşevski, Ernesto İnarkiyev, ukraynalılar Pavel Elyanov, Ruslan  Ponomaryov, ingilis Maykl  Adams və başqaları turnirlə vidalaşmalı olmuşlar.

Azərbaycan şahmatçıları Şəhriyar Məmmədyarov və Teymur Rəcəbov ikinci mərhələdə müvafiq surətdə Yuri Kuzubov (Ukrayna) və Vladislav Artemyevlə (Rusiya) qarşılaşmışlar. Hər iki matçın əsas görüşlərində heç-heçə qeydə alınmışdır – 1:1.

Bu rəqiblərin görüşlərində, habelə daha bir neçə matçda qaliblərin müəyyənləşdirilməsi üçün dünən tay-breyklər keçirilmişdir.

Üçüncü mərhələ (1/16 final) matçları sentyabrın 9-11-nə təyin edilmişdir.

Dördüncü tur starta çıxır

Bu gün “Qəbələ” – “Zirə” və “İnter” – “Kəpəz” görüşləri ilə Topaz Premyer Liqasında dördüncü tura start veriləcək.  Sabah isə “Sumqayıt” və “Neftçi” komandaları qarşılaşacaqlar. Turun daha bir oyunu “Səbail” – “Qarabağ” görüşü UEFA  Çempionlar Liqasının qrup mərhələsi sınaqlarına hazırlaşan  Ağdam klubu rəhbərliyinin xahişi ilə başqa vaxta keçirilmiş və dekabrın 8-də oynanılacaq.

Dördüncü tur ərəfəsində turnir cədvəlinə yüzfaizli nəticə ilə başçılıq edən “Zirə” və “Qarabağ” 9 xal toplamışlar, cədvəldə onların ən yaxın izləyicisi “Qəbələ” 6 xala malikdir.

Bu arada Çempionlar Liqasının qrup turniri oyunlarına bir qədər də yaxınlaşmışıq. Azərbaycan çempionunun Londonda “Çelsi” ilə sentyabrın 12-də keçiriləcək ilk görüşünə cəmi üç gün qalır.

Oqtay BAYRAMOV, “Xalq qəzeti”