UEFA Çempionlar Liqası turnirinin pley-off mərhələsinin start görüşlərindən bizi cəmi bir həftəlik məsafə ayırır. Artıq bildiyiniz kimi, Azərbaycan çempionu “Qarabağ” qrup mərhələsinin astanasında Danimarkanın “Kopenhagen” klubu ilə ilk oyunu avqustun 15-də Tofiq Bəhramov adına Respublika Stadionunda keçirəcək, Kopenhagendə cavab görüşü isə avqustun 23-nə təyin edilmişdir.

İki gün əvvəl “Kopenhagen” Danimarka çempionatında növbəti oyunda meydana çıxmışdır. Rəqibimiz səfərdə “Brondbü” klubunun qonağı olmuş və 0:1 hesabı ilə uduzmuşdur. Meydan sahibləri qələbə topunu 90-cı dəqiqədə vurmuşlar.

Statistiklər xatırladırlar ki, Danimarka paytaxtı təmsilçisi ümumiyyətlə, indiyə qədər öz ölkəsinin çempionatında 12 dəfə qızıl medal qazanmış, 8 dəfə ölkə kubokuna sahib olmuş, Danimarka superkubokunun isə üçqat qalibidir.

Bu arada məlum olmuşdur ki, komandaların dəyərinə görə “Qarabağ” Çempionlar Liqasının pley-off mərhələsinin 20 iştirakçısı arasında sonuncudan əvvəlki yerdədir. Ağdam klubunun dəyəri 12, 25 milyon avrodur. “Kopenhagen”in isə dəyəri bundan iki dəfədən də çox–28,35 milyon avrodur.

Pley-off mərhələsinin ən bahalı komandası İngiltərənin ­“Liverpul” klubu (457,5 milyon), ən ucuzu isə “Maribor”dur
(Sloveniya)–12,2 milyon avro.

Oqtay BAYRAMOV,
“Xalq qəzeti”