Bu gün İsveçrənin Bil şəhərində mötəbər beynəlxalq şahmat turnirinə start veriləcək. Avqustun 1-dək davam edəcək turnirin mükafatları uğrunda altı qrossmeyster mübarizə aparacaq.

 

Reytinqə görə iştirakçıların siyahısına dünya çempionu Maqnus Karlsen (Norveç, 2842) başçılıq edir. Azərbaycanlı qrossmeyster Şəhriyar Məmmədyarov (2801) siyahıda ikinci, fransız Maksim Vaşye-Laqrav (2779) üçüncüdür. 

Turnirdə bu üçlüklə yanaşı Pyotr Svidler (Rusiya, 2753), David Navara (Çexiya, 2741) və Niko Georgiadis (İsveçrə, 2526) çıxış edəcəklər.

Bu arada Rusiyanın kişilərdən ibarət milli komandasının baş məşqçisi, Rusiya Şahmat Federasiyasının prezidenti Andrey Filatov sentyabrın 23-dən oktyabrın 6-dək Gürcüstanın Batumi şəhərində keçiriləcək 43-cü Ümumdünya Şahmat Olimpiadasında iştirak edəcək komandanın heyətini açıqlamışdır.

Rusiya Şahmat Federasiyasının saytında qeyd olunduğu kimi, komanda Olimpiadanın medalları uğrunda Vladimir Kramnik, Sergey Karyakin, Yan Nepomnyaşi, Dmitri Yakovenko və Nikita Vityuqovdan ibarət heyətlə mübarizə aparacaq.

Xatırladaq ki,42-ci Ümumdünya Şahmat Olimpiadası 2016-cı ildə Bakıda təşkil olunmuşdu.

Oqtay BAYRAMOV,

“Xalq qəzeti”