Futbol üzrə dünya çempionatında iştirak etmək üçün Rusiyaya gələn komandaların sayı getdikcə artır. Mundialın keçiriləcəyi ölkəyə birinci qədəm qoyan İran millisindən sonra Panama və İspaniya yığmaları da artıq çempionata hazırlığı Rusiya stadionlarında davam etdirirlər. 

İran və İspaniya komandaları dünya çempionatının ilkin mərhələsində eyni qrupda çıxış edəcək və iyunun 20-də Kazanda qarşılaşacaqlar.

Bu arada dünya çempionatının iştirakçıları qarşıdakı çətin sınaqlara hazırlıq proqramı çərçivəsində növbəti yoxlama görüşlərində meydana çıxmışlar. 

İngiltərənin Lids şəhərində İngiltərə – Kosta-Rika matçında ingilislərin xeyrinə 2:0 hesabı qeydə alınmışdır. Lissabonda Portuqaliya – Əlcəzair görüşündə azarkeşlər daha çox qolun şahidi olmuşlar – 3:0. Montevideoda Uruqvay – Özbəkistan qarşılaşmasında da meydan sahibləri qonaqları üç cavabsız qolla məğlubiyyətə uğratmışlar.

Oqtay BAYRAMOV, “Xalq qəzeti”