Qadın voleybol komandaları arasında Avropa Qızıl Liqa turnirinin qrup mərhələsinə Bakıda Ukrayna yığması üzərində qələbə ilə başlayan (3:1) Azərbaycan millisi start turundan sonra “A” qrupunun iki liderindən biridir. Digər lider Bolqarıstan kollektivi ilk oyunda Portuqaliya komandasına qalib gəlmişdir (3:0).

Qrupda ikinci turun görüşləri mayın 23-də keçiriləcəkdir. Həmin gün Azərbaycan voleybolçuları Portuqaliya komandasını qəbul edəcəklər. Faiq Qarayevin yetirmələri turnirin birinci dövrəsini mayın 27-də Sofiyada bolqarıstanlı rəqiblərə qarşı görüşlə başa vuracaqlar.

Avropa Qızıl Liqa turniri hərəsində dörd komanda olmaqla üç qrupda keçirilir. Qrupların qalibləri “Dördlər finalı”nda oynamaq hüququ qazanacaqlar. Bu mərhələdə Macarıstan komandası da yarış sahibi kimi onlara qoşulacaq. “Dördlər finalı” iyunun ikinci yarısında Budapeştdə keçiriləcəkdir.

Oqtay BAYRAMOV,
“Xalq qəzeti”