İyunun 23-də Bakıda Yeniyetmələrin Yay Olimpiya Oyunlarına təsnifat xarakterli idman gimnastikası turnirinə start veriləcək.

Milli Gimnastika Arenasında qarşıdakı payızda Argentinanın paytaxtı Buenos-Ayresdə keçiriləcək Olimpiadaya lisenziya uğrunda 34 ölkədən 58 oğlan və 54 gimnast qızın iştirakı gözlənilir. Turnirdə Azərbaycanı Samirə Qəhrəmanova, Ağamurad Qəhrəmanov və Səməd Məmmədli təmsil edəcəklər.

Bu barədə azerisport-un yaydığı xəbərdə, həmçinin bildirilir ki, çoxnövçülüyün yekununda ilk 17 yeri tutan gimnastlar Olimpiya oyunlarına vəsiqə qazanacaqlar. Hər ölkədən yalnız bir nəfərin Buenos-Ayresə “bilet” ala biləcəyi də diqqətə çatdırılır.

Oqtay BAYRAMOV,
“Xalq qəzeti”