Şahmat üzrə dünya çempionu norveçli Maqnus Karlsen mayın 10-da Nyu-Yorkda BMT-nin mənzil-qərargahında eyni vaxtda oyun seansı keçirmişdir.

TASS-ın NRK-ya istinadla yaydığı xəbərdə bildirilir ki, tədbirdə BMT əməkdaşları iştirak etmişlər. Oyun üçün Rusiya, Çexiya, Bəhreyn, ABŞ, Əfqanıstan, Malayziya, Livan, Fici, Filippin və İsveçdən 15 nəfər seçilmişdir.

Bütün görüşləri udmaq üçün Karlsenə yarım saat vaxt ayrılmışdı. Ancaq ona 17 dəqiqə kifayət edib.

Qrossmeyster demişdir: Oynamaq maraqlı idi. Elə görünür ki, yarım saat bundan ötrü az vaxtdır. Lakin rəqiblərim uduzmağa başlayanda tədricən işim asanlaşırdı.

Oqtay BAYRAMOV,
“Xalq qəzeti”