Azərbaycanın taekvondo ustaları Rusiyanın Kazan şəhərində keçirilən kişi və qadınlar arasında Avropa çempionatına bir bürünc medalla başlamışlar.

Yarışın birinci günü dayanq üzərinə çıxan dörd idmançımızdan Patimat Abakarova (49 kq) fərqlənmişdir. Rio-de-Janeyro Olimpiadası –2016-nın bürünc mükafatçısı olan təmsilçimiz bolqarıstanlı və rusiyalı rəqiblərinə qalib gəldikdən sonra yarımfinalda Xorvatiya taekvondoçusuna uduzmuş və çempionatda çıxışlarını bürünc medalla başa vurmuşdur.

Bu çəki dərəcəsində Avropa çempionu adını Kristina Tomiç (Xorvatiya) qazanmışdır. İkinci yeri Natalya Antipenko (Rusiya) tutmuşdur. Daha bir bürünc mükafata isə Fransa təmsilçisi Yasmina Aziz sahib olmuşdur.

Kazanda taekvondoçuların Avropa çempionatında bu gün növbəti çəki dərəcələrində görüşlər keçirilir.

“Xalq qəzeti”