Azərbaycan bədii gimnastları Milli Gimnastika Arenasında keçirilmiş “AGF Junior Trophy” beynəlxalq turnirində uğurla çıxış edərək ölkəmizə dörd medal qazandırmışlar.

Mükafatlarımızın hesabını Dərya Fərşabafşəhriyari və Arzu Cəlilovadan ibarət heyət komanda hesabında bürünc medalla açmışdır.

Turnirin sonrakı günlərində isə Azərbaycan gimnastları ayrı-ayrı təmrinlərdə fərqlənmişlər: A.Cəlilova lentlə hərəkətlərin yerinə yetirilməsində bütün rəqiblərindən yüksək ustalıq nümayiş etdirərək qızıl medal qazanmış, Nərminə Səmədova topla təmrinlərin icrasında yalnız qalibdən geri qalıb gümüş mükafatçı olmuş, D.Fərşabafşəhriyari isə halqa ilə hərəkətlərdə üçüncü yeri tutmuşdur.

On səkkiz ölkə təmsilçisinin iştirak etdiyi yarışda qazanılmış dörd medal Azərbaycan bədii gimnastlarının gələcək yarışlarda da ümidləri doğruldacaqlarına inamı daha da artırır.

O.BAYRAMOV,
“Xalq qəzeti”