Şəmkirdə Vüqar Həşimovun xatirəsinə həsr edilmiş 5-ci beynəlxalq superturnirin birinci yarısının qalibi Veselin Topalov olmuşdur.

Bolqarıstanlı keçmiş dünya çempionu beşinci turda qara fiqurlarla David Navaranı (Çexiya) məğlubiyyətə uğradaraq qələbələrinin sayını 2-yə, xal ehtiyatını isə 3,5-ə çatdırıb yarışda istirahət gününü vahid lider mövqeyində qarşılamışdır.

Beşinci tur Maqnus Karlsen (Norveç) üçün də uğurlu olmuşdur. Dünya çempionu dörd heç-heçədən sonra ilk qələbəsini polyak Radoslav Voytaşek üzərində qazanmışdır. Fasiləyə 3 xalla çıxan Karlsen liderin ən yaxın izləyicisidir.

Azərbaycanlı qrossmeysterlər fasiləyədək qələbələrinin hesabını aça bilməmişlər. Hesabat turunda Rauf Məmmədov Sergey Karyakinlə (Rusiya), Teymur Rəcəbov Din Lijenlə (Çin), Şəhriyar Məmmədyarov Aniş Giri (Hollandiya) ilə görüşlərdən yarım xalla ayrılmışlar.

Turnirdə bir günlük istirahətdən sonra dünən keçirilmiş 6-cı turda Rəcəbov Voytaşeklə, Məmmədov Topalovla, Məmmədyarov Lijenlə heç-heçəyə razılaşmışlar.

Turun digər iki görüşündə Karyakin Karlsenlə heç-heçə oynamış, Giri isə Navaraya qalib gəlmişdir.

Oqtay BAYRAMOV,
“Xalq qəzeti”