Şəmkirdə Vüqar Həşimovun xatirəsinə həsr edilmiş 5-ci beynəlxalq superturnirin birinci yarısının qalibi Veselin Topalov olmuşdur. Bolqarıstanlı keçmiş dünya çempionu beşinci turda qara fiqurlarla David Navaranı (Çexiya) məğlubiyyətə uğradaraq qələbələrinin sayını 2-yə, xal ehtiyatını isə 3,5-ə çatdırıb yarışda istirahət gününü vahid lider mövqeyində qarşılamışdır.

Beşinci tur Maqnus Karlsen (Norveç) üçün də uğurlu olmuşdur. Dünya çempionu dörd heç-heçədən sonra ilk qələbəsini polyak Radoslav Voytaşek üzərində qazanmışdır. Fasiləyə 3 xalla çıxan Karlsen liderin ən yaxın izləyicisidir.

Azərbaycanlı qrossmeysterlər hələlik qələbələrinin hesabını aça bilməmişlər. Hesabat turunda Rauf Məmmədov Sergey Karyakinlə (Rusiya), Teymur Rəcəbov Din Lijenlə (Çin), Şəhriyar Məmmədyarov Aniş Giri (Hollandiya) ilə görüşlərdən yarım xalla ayrılmışlar.

Hazırda cədvəlin üçüncü-yeddinci pillələrində olan Rəcəbov, Məmmədov, Lijen, Giri və Karyakin 2,5, sonuncu üç yeri tutan Məmmədyarov, Voytaşek və Navara 2 xal toplamışlar. Finişə isə dörd tur qalır.

Oqtay BAYRAMOV,
“Xalq qəzeti”