Azərbaycanın qadınlardan ibarət milli güləş komandasının lideri Mariya Stadnik özünün böyük qələbələrlə zəngin idman həyatına daha bir qızıl səhifə yazmışdır. Olimpiya oyunlarının üçqat mükafatçısı bu dəfə Sofiyada 56-cı “Dan Kolov–Nikola Petrov” beynəlxalq turnirində fəxri kürsünün zirvəsində təbrikləri qəbul etmişdir.

İlk iki görüşdə fransalı və polşalı rəqiblərinə heç bir ümid yeri qoymayan (müvafiq surətdə 11:0 və 10:0) Stadnik yarımfinalda Nadejda Sokolovaya, finalda isə onun həmvətəni Milana Dadaşovaya da böyük üstünlüklə (hər iki görüşdə 14:4 hesabı ilə) qalib gələrək 50 kq çəki dərəcəsində qızıl medala layiq olduğunu inamla sübuta yetirmişdir.

Bolqarıstana səfər yunan-Roma üsulu ilə güləşən Elman Muxtarov (67 kq) üçün də uğurlu olmuşdur. O, turnirdə çıxışlarını bürünc medalla başa vurmuşdur.

Əgər Sofiya startlarının ilk iki günündə yunan-Roma güləşçisi Rəsul Çunayevin (72 kq) qızıl və Elisa Manolovanın (65 kq) bürünc mükafat qazandıqlarını da xatırlasaq, turnirdə dörd nəfərlə təmsil olunan güləşçilərimizin Bolqarıstan paytaxtından Azərbaycana 2 qızıl və 2 bürünc medal gətirmələri, həqiqətən, böyük müvəffəqiyyətdir.

O. BAYRAMOV,
“Xalq qəzeti”