Gürcüstanın Batumi şəhərində keçirilən kişilər arasında şəxsi Avropa çempionatının 5-ci turu Azərbaycan şahmatçısı Qədir Hüseynova üçüncü qələbə sevinci yaşatmışdır. Qrossmeysterimiz artıq 22-ci gedişdə rumıniyalı Boqdan–Daniel Dyakı məğlubiyyətlə barışmağa məcbur etmişdir.

Bu tur həmçinin Eltac Səfərlinin Tiqran Arutyunyan (Ermənistan) üzərində qələbəsi, Nicat Abasovun rusiyalı Olqa Girya ilə görüşdə müvəffəqiyyəti ilə yadda qalacaq. Hesabat turunda Rauf Məmmədovun həmyerlisi Ülvi Sadıqova qalib gələrək özünün turnir vəziyyətini bir qədər yaxşılaşdırdığını da qeyd edək.

Ümumi mükafat fondu 100 min avro olan 11 turdan ibarət turnirdə beş turdan sonra ilk üç yeri bölüşdürən israilli Tanar Nabati, Hollandiya təmsilçisi Benjamin Bok və İvan Sariç (Xorvatiya) hərəyə 4,5 xal toplamışlar. Azərbaycan şahmatçıları arasında daha yaxşı çıxış edən Hüseynovun 4, Səfərli ilə Abasovun 3,5 xalı var.

Dünən Avropa çempionatı iştirakçıları 6-cı turun görüşlərində mübarizə aparmışlar.

Oqtay BAYRAMOV,
“Xalq qəzeti”