Azərbaycan xalqı insanın yaranışı və təbiətin oyanışı ilə bağlı təsəvvürlərini Novruz bayramında ümumiləşdirərək zəngin dəyərlər sistemi yaratmışdır. Novruz bayramı tarixi-mədəni keçmişimizə yüksək ehtiramın, milli dəyərlərimizə dərin bağlılığın ifadəsidir. Buna görədir ki, ulu öndərimiz Heydər Əliyev ölkəmizə rəhbərliyinin bütün dövrlərində Novruz ənənələrinin yaşadılması qayğısına qalmış, bu bayramı milli varlığımızın və müstəqil dövlətçiliyimizin rəmzinə çevirmişdir. Ölkə Prezidenti cənab İlham Əliyevin Novruz bayramı münasibətilə xalqımıza təbrikində deyildiyi kimi: "Azərbaycan torpağında qədim tarixi köklərə malik Novruz bayramı uzaq keçmişlərdən mənəvi dünyamızın ən dərin qatlarınadək nüfuz etmiş, müqəddəs dəyərlərimizin təşəkkülünə töhfələr vermiş və milli düşüncə tərzimizin ayrılmaz tərkib hissəsi olmuşdur... Novruz bayramı azadlıq və istiqlal duyğularımızın ifadəsinə çevrilməklə möhtəşəm yubileyi ərəfəsində olduğumuz Azərbaycan Xalq Cümhuriyyətinin gerçəkləşməsi və XX əsrin sonlarına doğru xalqımızın müstəqil dövlətçilik idealına yenidən qovuşması üçün zəmin hazırlamış milli özünüdərk amillərindəndir".

Naxçıvan Muxtar Respublikasında Novruz bayramı hər il yüksək nailiyyətlərlə qarşılanır, baharın gəlişi quruculuq, əmin-amanlıq və sabitlik şəraitində qeyd olunur.

Martın 19-da Naxçıvan şəhərindəki “Əcəmi Seyrangahı” Mədəniyyət və İstirahət Kompleksində Novruz bayramı münasibətilə bayram şənliyi keçirilmişdir.

Naxçıvan Muxtar Respublikası Ali Məclisinin sədri Vasif Talıbov ailə üzvləri ilə birlikdə bayram şənliyində iştirak etmişdir.

Milli geyimli oğlan və qız Ali Məclisin sədrinə səməni təqdim etmişlər.

Naxçıvan Dövlət Filarmoniyasının rəqs qrupunun ifasında “Odlar yurdu” rəqsi təqdim olunmuşdur.

Xalq yaradıcılığımızın ən qədim nümunələrindən olan, milli musiqimizin və söz sənətimizin incəliklərini özündə birləşdirən aşıq sənəti bu gün də muxtar respublikada yaşadılır. Xalq yaradıcılığı günlərində saza, sözə də yer verilir, aşıq havaları təqdim olunur. Tədbirdə Naxçıvan Aşıqlar Birliyinin üzvləri “Ana yurdum Naxçıvan” havasını ifa etmişlər.

Naxçıvan Musiqi Kollecinin “Muğam üçlüyü”nün çıxışı, Sazçalanlar ansamblının ifasında səslənən “Kəndimiz” gözəlləməsi alqışlarla qarşılanmışdır.

Bu gün muxtar respublikada milli rəqslərimiz, xüsusilə yallı gələcək nəsillərə öyrədilərək yaşadılır, təbliğ olunur. Tədbirdə Heydər Əliyev Uşaq Gənclər Yaradıcılıq Mərkəzinin “Əlvan çiçəklər” mahnı və rəqs ansamblının üzvləri milli rəqslərimizi məharətlə ifa etmişlər.

 Tarixi min illərə söykənən musiqi alətlərimizdə - tulum, zurna, balaban və tütəkdə təqdim olunan milli musiqi nümunələri bayram tədbirində xoş ovqat yaratmışdır.  

Naxçıvan şəhər sakini Sürəyya Ələkbərova muxtar respublikadakı əmin-amanlığın, sabitliyin və inkişafın Novruz bayramını xoş ovqatla qarşılamağa imkan verdiyini bildirmiş, Ali Məclisin sədrinə sakinlər adından təbriklərini çatdırmışdır.

Novruzla bağlı yaranan folklor nümunələri xalqımızın qədim məişət həyatı, həyat tərzi və inancları haqqında dolğun məlumat verir. Naxçıvan Qızlar Liseyinin şagirdləri bayatı, tapmaca və Novruz inanclarından ibarət kompozisiya təqdim etmişlər.

Sonra Naxçıvan Musiqi Kollecinin “Naxçıvanqala” ritm qrupunun və Naxçıvan Dövlət Uşaq Filarmoniyasının rəqs qrupunun çıxışları olmuşdur.

Naxçıvan Muxtar Respublikası Ali Məclisinin sədri Vasif Talıbov bayram tədbirində çıxış edərək demişdir: Novruz bayramı milli dəyərlərimizi və adət-ənənələrimizi özündə təcəssüm etdirir. Buna görədir ki, bütün tarix boyu bu bayram milli birlik rəmzi kimi qəbul olunubdur. Builki Novruz bayramı sonuncu çərşənbə ilə eyni gündə qeyd olunur.

Ali Məclisin sədri Novruz bayramı və Od çərşənbəsi münasibəti ilə muxtar respublikanın əhalisini, hərbi hissələrinin şəxsi heyətlərini və tədbir iştirakçılarını təbrik edərək demişdir: Novruz bayramı muxtar respublikada əmin-amanlıq içində, sabitlik və firavanlıq şəraitində qarşılanır. Ötən il muxtar respublika iqtisadiyyatının bütün sahələrində davamlı inkişaf təmin edilmiş, sabitlik möhkənləndirilmiş, əhalinin rifahı yaxşılaşdırılmışdır. Bu dövrdə ümumi daxili məhsul istehsalının həcmi 2 milyard 701 milyon manatdan artıq olmuş, 60 yeni istehsal və xidmət obyekti yaradılmışdır. Həmişə olduğu kimi, 2017-ci ildə də  tikinti-quraşdırma işləri davam etdirilmiş, 236 müxtəlif təyinatlı obyekt tikilərək və ya yenidən qurularaq istifadəyə verilmişdir. 2017-ci ildə muxtar respublikada 967 milyon manatdan çox sənaye, 453 milyon manatdan artıq kənd təsərrüfatı məhsulu istehsal olunmuşdur. Yerli istehsalın həcminin artması xarici ticarət əlaqələrinin inkişafına da öz təsirini göstərmiş, 50-dən çox ölkə ilə ticarət əlaqələri yaradılmışdır. Bu gün qeyd etmək xoşdur ki, qazanılan nailiyyətlər muxtar respublikanın iqtisadi potensialını artırmışdır. Uğurlu inkişafın nəticəsidir ki, Azərbaycan Respublikası Prezidentinin sədri olduğu “Caspian European Club”un 2017-ci il üçün hazırladığı investisiya reytinqində Naxçıvan Muxtar Respublikası ən yüksək ümumi bal toplayaraq birinci yerə çıxmışdır.

Ali Məclisin sədri bir daha tədbir iştirakçılarının Novruz bayramını təbrik etmiş, bayram tonqalını yandırmışdır.

Naxçıvanda qədim musiqi alətlərimizin bərpasına xüsusi diqqət yetirilir. Bu sahədə görülən işlərin nəticəsidir ki, Naxçıvan Dövlət Filarmoniyasında Qədim Musiqi Alətləri Ansamblı yaradılmışdır. Tədbirdə ansablın ifasında xalq mahnılarımız səslənmişdir.

Naxçıvan Dövlət Kukla Teatrının kollektivi “Bahar sovqatlı Novruz” tamaşasını səhnələşdirmiş, Naxçıvan şəhər Uşaq Musiqi və İncəsənət Məktəbinin “Nağaraçalanlar” ansamblının ifasında maraqlı kompozisiya təqdim olunmuşdur.

Bayram şənliyində ictimai-iaşə xidməti də göstərilmiş, yerli müəssisələrin istehsal etdikləri məhsulların satışı təşkil edilmiş, muxtar respublikada hazırlanan müxtəlif növ bayram şirniyyatları, şərbət və içkilər tədbir iştirakçılarına təklif olunmuşdur.

Həmin gün muxtar respublikanın rayon mərkəzlərində də Novruz bayramı münasibətilə şənliklər keçirilmişdir.

“Xalq qəzeti”