Şəmkirin Kür qəsəbə mədəniyyət evinin kollektivi rayonda az mədəni-kütləvi tədbir olar ki, iştirak etməsin. Maraqlıdır ki, kollektivin çıxışlarının biri digərinə bənzəmir və daim öz rəngarəngliyi, məzmunlu olması ilə fərqlənir. Digər tərəfdən hər tədbirə, hər bayrama uyğun geyimlərdən, kompazisiyalardan istifadə olunması kollektivin çıxışlarını daha da maraqlı, baxımlı edir.

Mədəniyyət evinin direktoru Rəfiqə Mürsəlova öz işinin fədaisidir, desək yanılmarıq. Azərbaycan Dövlət Mədəniyyət və İncəsənət Universitetinin məzunu olan R. Mürsəlova uzun illərdir ki, bu sahədə çalışır və daim kollektivin fəaliyyətində yeniliklərin tətbiqinə nail ola bilir. Əsgərlər, veteranlar, məktəb və məktəbəqədər təhsil müəssisələri kollektivləri qarşısındakı çıxışlar  uzun müddət yaddaşlarda qalır və mədəniyyət işçilərini yenidən belə görüşlərə dəvət edirlər.

Bu il də kollektiv maraqlı və məzmunlu çıxışları ilə nümunə göstərir. Hazırda Novruz bayramı münasibətilə xüsusi proqram hazırlanıb və müxtəlif kollektivlərdə keçirilən görüşlərdə, tədbirlərdə bütün bunları görmək mümkündür.

Qeyd edək ki, R.Mürsəlova rayon icra hakimiyyətinin hər ilin sonunda keşirdiyi «İlin adamı» nominasiyasının dalbadal iki dəfə qalibi olub və xüsusi ödülə layiq görülüb.

Hamlet Qasımov,
“Xalq qəzeti”nin bölgə müxbiri