Azərbaycan Birlik Təşkilatının təşəbbüsü ilə Xocalı soyqırımı qurbanlarının xatirəsi İstanbulda da anılmışdır.
Fevralın 26-da 613 gənc İstanbulun Taksim meydanında eyni anda yerə uzanaraq faciəyə öz etirazlarını bildirmişlər.
Gənclər ermənilərin tərəfindən Xocalıda Azərbaycan xalqına qarşı törətdikləri dəhşətli cinayətlərə etiraz olaraq belə bir üsulla dünyanın diqqətini çəkməyə çalışmışlar. Xocalıda şəhid olan 613 məsumu təmsil edən könüllülər arasında azərbaycanlı və türk tələbələrdən başqa Türkiyədə təhsil alan xarici tələbələr də olmuşdur.
Azərbaycan Birlik Təşkilatı həmsədrlərindən Nurlan Kərimov, Xocalı faciəsini təkcə azərbaycanlılara deyil, bütün bəşəriyyətə qarşı törədilmiş cinayət adlandırmış, beynəlxalq təşkilatları bu qətliama biganə qalmamağa çağırmışdır.

AzərTAc