Bakıda səfərdə olan Beynəlxalq Mətbuat İnstitutunun direktoru Alison Betel Makkenzi fevralın 23-də İctimai Televiziya və Radio Yayımları Şirkətində baş direktor İsmayıl Ömərovla görüşmüşdür.
İctimai Teleradionun ictimaiyyətlə əlaqələr və internet şöbəsindən bildirmişlər ki, İ.Ömərov qonağa televiziyanın fəaliyyəti, texniki imkanları və beynəlxalq əlaqələri haqqında məlumat vermişdir. Avropa Yayımları Birliyi və Asiya Yayımları Birliyinin Azərbaycandan yeganə üzvü olan İctimai Teleradionun geniş beynəlxalq əlaqələrinin olduğu diqqətə çatdırılmışdır. Sözügedən təşkilatlara üzvlük müddətində bir sıra önəmli tədbirlərin, layihələrin həyata keçirildiyi bildirilmişdir. İ.Ömərov İctimai Teleradionun Avropa Yayımları Birliyinin gənc üzvü olmasına baxmayaraq, 2010-cu ilin iyul ayında qurumun Baş Assambleyasının 64-cü sessiyasına uğurla ev sahibliyi etdiyini qonaqların diqqətinə çatdırmışdır. Baş direktor bildirmişdir ki, İctimai Teleradio beynəlxalq media qurumları ilə əlaqələrin daha da genişlənməsinə xüsusi diqqət yetirir. Bu baxımından görüşdə Beynəlxalq Mətbuat İnstitutu ilə əməkdaşlıq imkanları da müzakirə olunmuşdur.
Daha sonra qonaq şirkətin studiyalarını gəzmiş, əməkdaşlarla görüşmüş və verilişlərin hazırlanması prosesi ilə maraqlanmışdır. Xanım Alison Betel Makkenzi İctimai televiziya və radioda mövcud şəraitdən razı qaldığını bildirmişdir. Azərbaycanda media nümayəndələrinin çox fəal olduğunu bildirən qonaq İctimai Teleradio ilə Beynəlxalq Mətbuat İnstitutu arasında uzunmüddətli əməkdaşlığın qurulması istiqamətində çalışacağını da qeyd etmişdir.

AzərTAc